Qazaqstan Respýblikasy men Eýropalyq odaq arasyndaǵy Keden yntymaqtastyǵy kómekshi komitetiniń 4-shi virtýaldy otyrysy ótti, dep habarlaidy QazAqparat.
Eýropalyq odaq – Qazaqstan Respýblikasynyń negizgi saýda jáne investitsiia seriktesi. Qazaqstannyń syrtqy saýda ainalymy men el ekonomikasyna tartylǵan sheteldik kapitaldyń 30-dan 50 %-na deiin osy odaqqa tiesili.
2020 jyldyń bes aiynda ekijaqty taýar ainalymy 1,6 mlrd dollardy, iaǵni QR taýar ainalymynyń 33,2%-yn qurady. Qazaqstannyń iri saýda seriktesteriniń qatarynda Italiia, Niderlandy, Frantsiia jáne Grekiia bar.
Basqosý barysynda saýda rásimderin jeńildetý, tranzit erkindigin damytý, halyqaralyq keden jáne saýda standarttaryn engizý, quqyq qorǵaý qyzmeti, onyń ishinde esirtki saýdasy men temeki ónimderiniń kontrabandasymen kúres syndy mańyzdy máseleler qarastyryldy.
Sondai-aq taraptar Eýropa men Aziia arasyndaǵy ózara bailanysty qamtamasyz etý boiynsha ótken jyly qabyldanǵan EO-nyń Ortalyq Aziia boiynsha strategiiasyndaǵy («connectivity») kedendik yntymaqtastyqtyń jańa múmkindigin talqylady.
Strategiia áleýetin tiimdi paidalaný – azamattardyń ekonomikalyq jaǵdaiyn kóterý, jumys orynyn qurý jáne Eýropa men Aziia arasyndaǵy jetkizý qyzmetiniń qaýipsizdigin qamtamasyz etýge kómektesedi.
Kómekshi komitet tórt jyl ishinde keden qyzmeti jáne elimizdiń basqa da memlekettik organdarynyń ózara bailanys institýtyna ainaldy. Eki tarap seriktestikti ary qarai damytý týraly kelisimge keldi.
