Qazaqstan TMD sheńberinde Belarýstiń negizgi saýda seriktesteriniń úshtigine kiredi. Statistikalyq málimetter boiynsha, Qazaqstan men Belarýs arasyndaǵy taýar ainalymy 2015 jyly 519,7 mln dollardy quraǵan, bul kórsetkish 2014 jylmen salystyrǵanda 37,8%-ǵa tómen. Sondai-aq, Qazaqstannan Belarýske shyǵarylatyn eksport mólsheri 22,2%-ǵa qysqaryp, 47,7 mln dollar bolǵan. Belarýsten elmizge keletin import ta 39,0%-ǵa kemip, 472,0 mln dollardy qurapty. Mundai úderistiń qalyptasýyn sarapshylar eń aldymen, qazirgi álemdik ekonomikalyq daǵdarys jaǵdaiymen bailanystyryp otyr.
«Ekijaqty taýar ainalymnyń 90%-y Belarýs taýarlary men ónimderin qurasa, qalǵan 10%-y otandyq taýarlarǵa tiesili. Búgingi kúnge deiin eki eldiń arasyndaǵy taýar ainalymy birtindep ósip, shamamen 1 mlrd dollarǵa jaqyndap qalǵan edi. Alaida, qarjylyq daǵdarystyń áserinen bul kórsetkish ótken jyly 519 mln dollarǵa deiin tómendedi. Biylǵy jyly bul úderis áli de jalǵasyp keledi. Máselen, aǵymdaǵy jyldyń alǵashqy jartyjyldyǵynda taýar ainalymy 145,8 mln dollardy qurady. Bul ótken jylǵy dál osy ýaqyt aralyǵyndaǵy kórsetkishten 46,4%-ǵa tómen. Árine, bul jaǵdai eki elge ǵana bailanysty bolyp turǵan joq. Bul álemdegi ekonomikalyq jaǵdaidyń áserinen qalyptasqan úrdis. Biraq soǵan qaramastan, biz eksport-import, taýar ainalymy kórsetkishterin joǵarylatýǵa kúsh salatyn bolamyz». Syrtqy ister ministrligi arnaiy uiymdastyrǵan brifingte Qazaqstannyń Belarýs Respýblikasyndaǵy Tótenshe jáne ókiletti elshisi Erǵali Bólegenov osylai dedi.
Tótenshe jáne ókiletti elshi sondai-aq ekijaqty áriptestikke, qos memleket arasyndaǵy yntymaqtastyqtyń nyǵaiýyna memleket basshylarynyń senimge qurylǵan, dostyqqa negizdelgen qarym-qatynasy aitarlyqtai áser etkenin jetkizdi. Ol ǵarysh, aýyl sharýashylyǵy, ónerkásip, bilim-ǵylym, densaýlyq saqtaý, kommýnikatsiia, tranzit, IT-tehnologiia, jol-qurylys, mashina jasaý salalarynda oń áriptestik bailanys ornatylǵanyna toqtalyp ótti. Máselen, Belarýstiń 5 áskeri akademiiasy men joǵary oqý ornyn 2012 jyldan beri Qazaqstannan barǵan 300-ge tarta áskeri azamat támamdapty. Al búginde bul elde 300-den astam qazaqstandyq stýdent bilim alyp jatyr eken.
Láila EDILQYZY
"Egemen Qazaqstan"
.jpeg)