«Saǵynysh sazy sen ediń, ǵashyqtyń biri men edim...» dep bastalatyn, kópshilikke tanymal ánniń avtoryna qatysty daý shyqty. Sazger Birjan Asqarov týyndyny 15 jasynda ózi jazǵanyn aitsa, ándi kóp jyl oryndap júrgen Talǵat Jorabaev onyń sózine kúmán keltirdi, dep habarlaidy ult.kz KTK arnasyna silteme jasap habarlaidy.
«Saǵynysh sazy» áni 1990 jyldardan beri halyq arasynda aitylyp keledi. Keiin ony Talǵat Jorabaev úlken sahnada oryndap, kópshilikke tanytqan.
Al arada jyldar ótken soń Birjan Asqarov ánniń avtory ózi ekenin málimdedi. Onyń aitýynsha, týyndy osydan shamamen 36 jyl buryn, Túrkistan oblysy Otyrar aýdanyndaǵy ýchilishede birinshi kýrsta oqyp júrgen kezinde dúniege kelgen.
«Bul án Gúljazira degen qyzǵa arnalǵan án edi. Ózimmen kýrstas, býhgalterlik bólimde oqyǵan qyz. Al Habibi deitin jigit te bir qyzǵa ǵashyq boldy, ánniń ekinshi kýpletin sol jazǵan. "Saǵynysh sazy" bolyp, halyqtyń aýzynda solai atalyp ketti. Sodan qulaqtan-qulaqqa, aýyzdan-aýyzǵa tarap, bul án osylai ketti. Bala kezdegi ǵashyǵym. 15 jasymda jazylǵan án», – dedi sazger.
Birjan Asqarov ándi eshbir oryndaýshyǵa usynbaǵanyn, ózi aýylda aityp júrgenin jetkizdi. Onyń sózinshe, keiin týyndy halyq arasynda tarap, «kóshe ánine» ainalǵan.
Sazger Talǵat Jorabaevpen 2010 jyldary bailanys ornatýǵa tyrysqanyn da aitty. Alaida ánshi kezdesýge kelispegen.
«Birjan Asqarovpyn, seniń oryndaǵan "Saǵynysh sazy" ánińniń avtory bolam, jolyǵyp, kezdesip, sóilessek dep aitqan edim. "Ýaqytym joq" dedi. Sol maǵan aýyr tidi, kóńilime keldi. Bylai aitqanda, qurmetsizdik kórsetti», – dedi ol.
Al Talǵat Jorabaev ánniń avtory Birjan Asqarov ekenine kúmán keltiretinin aitty. Onyń sózinshe, týyndy kezinde aýyzdan-aýyzǵa tarap, halyq áni retinde oryndalyp júrgen.
«Bul ánniń avtoryn bilmeimin. Kezinde aýyzdan-aýyzǵa, halyq áni bop, baiaǵy halyq ánderi siiaqty taralyp júrdi ǵoi. Bir jaǵynan kúmándanam, naqty dáleldesin osy án ekenin. Dáleldep bolǵannan keiin men ózimniń aitatynymdy aitamyn», – dedi ánshi.
Osylaisha, ánniń avtorlyǵyna qatysty eki taraptyń pikiri ekige bólinip otyr. Birjan Asqarov óz avtorlyǵyn dáleldeýge daiyn ekenin aitsa, Talǵat Jorabaev naqty dálel talap etedi.
Sazger budan bólek, Qazaqstan avtorlar qoǵamyna da ókpesi bar ekenin aityp, ózge týyndylary úshin uiymnan aqy almaǵanyn málimdedi.
