AQSh-tyń Qazaqstandaǵy elshisi Djordj Krol bolashaqta eki el arasynda vizasyz tártip bolýy múmkin ekenin joqqa shyǵarmady. Bul týraly ol búgin Memleket basshysy Nursultan Nazarbaevtyń Vashingtonǵa resmi saparynyń qorytyndysyna orai BAQ ókilderimen bolǵan kezdesýde aitty, dep habarlaidy "Ult aqparat".
«AQSh-tyń viza saiasaty negizinen kóptegen agenttikterge, atap aitqanda el Úkimetine, Memlekettik departamentke qatysty. Biz qazaqstandyqtardyń Amerikaǵa kelýin jeńildetýdi qalaimyz. Qazirgi ýaqytta vizany 10 jylǵa beremiz. Buryn 5 jyl bolatyn. Munan ary qalai keńeite alatyndyǵymyzdy qarastyramyz. AQSh pen Qazaqstan arasynda vizasyz rejim qashan ornaityndyǵyn dóp basyp aita almaimyn. Degenmen, onyń bolýy múmkin ekendigin de joqqa shyǵarmaimyn. Qazir biz bul ózekti máseleni satylai sheship jatyrmyz», - deidi Djordj Krol AQSh elshiligindegi jýrnalistermen ótken dóńgelek ústel barysynda.
Munyń aldynda Nursultan Nazarbaev Amerikanyń prezidenti Donald Trampqa Qazaqstandaǵy AQSh azamattary úshin engizilgen vizasyz tártipke qatysty jaýap kútetinin aitqan bolatyn.
