Búgin qazaqstandyq áskeri qyzmetshiler toby Livanǵa bitimgershilik missiialaryn atqarýǵa attandy. Bul týraly Qorǵanys ministrligi habarlady.
Bul «Livandaǵy BUU-nyń Ýaqytsha kúshteri» missiiasynyń quramynda qyzmet atqarýǵa bara jatqan tórtinshi bitimgerler toby. Óńirlik qolbasshylyqtar men desanttyq-shabýyldaý áskerleriniń áskeri qyzmetshileri 2019 jylǵy qarashadan beri Livanda bolǵan qazaqstandyqtardy aýystyrady.
«Qazaqstan Qarýly Kúshteriniń bitimgershilik qyzmeti – bul halyqaralyq áskeri yntymaqtastyqtyń damýymen qatar áskeri qyzmetshiler úshin baǵa jetpes tájiribe. Missiiaǵa qatysý halyqaralyq qaýipsizdikti nyǵaitýǵa yqpalyn tigizedi jáne halyqaralyq qoǵamdastyqtaǵy jaýapty múshesi retinde Qazaqstan týraly oń imidjdi qalyptastyrady. Sizderdiń elimizden jyraqta júrseńizder de óz mindetterińizdi abyroimen oryndaityndaryńyzǵa senemin», – dep Desanttyq-shabýyldaý áskerleriniń qolbasshysy general-maior Qanysh Ábýbákirov bitimgerlerge tilegin aitty.
Burynǵydai, qazaqstandyq áskeri qyzmetshiler jarty jyl boiy Livan Respýblikasyndaǵy úndi bitimgershilik batalony quramynda bolady. Bitimgerler jergilikti aýmaqty patrýldeý, azamattyq turǵyndarǵa kómek kórsetý, baqylaý beketterin uiymdastyrý jáne missiia shtabynyń basqa da sharalaryna qatysatyn bolady. Kún saiyn qazaqstandyq jáne úndi bitimgerler 50-den kem emes tapsyrma oryndaidy.
Livanǵa attanatyn rota quramy dástúr boiynsha 120 adam quralǵan. Epidemiologiialyq jaǵdaidy eskere otyryp, jeke quramnyń densaýlyǵyn saqtaý maqsatynda áskeri qyzmetshilerdi jóneltý eki kezeńde - tamyz aiynyń basynda jáne ortasynda júzege asyrylady.
Bitimgerlerge qiyn klimattyq jaǵdaida qyzmet etýlerine týra keledi, sondyqtan úmitkerler qatań irikteýden, meditsinalyq komissiiadan, moraldyq-psihologiialyq turaqtylyqtaryn tekserýge arnalǵan synaqtardan ótti. Bitimgershilik missiiasynyń ofitserleri men serjanttary aǵylshyn tilin jaqsy biledi, sonymen qatar Birikken Ulttar Uiymynyń bitimgershilikke qatysty negizgi qujattarynyń erejelerimen tanys.
Eske sala ketsek, Qazaqstannyń Livandaǵy bitimgershilik missiiasy 2018 jyldyń qazan aiynda BUU-nyń mandatyna sáikes Livanda qazaqstandyq jáne úndi bitimgerlerin birlesip óristetý týraly memorandýmǵa qol qoiylǵannan keiin bastaldy.
