Qazaqstan Qytai úkimetine 116 mlrd teńgeni 20 jylda 154 mlrd teńge qylyp qaitarady. Bul týraly baq.kz habarlady.
Búgin Senattaǵy Qarjy jáne biýdjet komitetiniń keńeitilgen otyrysynda «Qazaqstan Respýblikasynyń úkimeti men Qytai Halyq Respýblikasynyń úkimeti arasyndaǵy Qytaidan jeńildetilgen nesie alý jónindegi negizdemelik kelisimdi ratifikatsiialaý» týraly zań jobasy qaraldy.
Komitet otyrysynda Qarjy vitse-ministri Rýslan Beketaev Qytai úkimetiniń 2 mlrd 60 mln iýan (116 mlrd teńge nemese 300 mln dollar) 20 jylǵa 2% mólsherlememen jeńildetilgen nesie alý týraly ministrlik usynysyn baiandady.
Senat depýtaty Áli Bektaev Qytai tarapy berip otyrǵan nesieni nelikten aýyl sharýashylyǵyna, shaǵyn jáne orta kásipkerlikke jumsalmaitynyn surady. Ol nege biz osy nesieni shekara mańyndaǵy beketterge jumsaitynyn bilgisi keldi.
«Qytai úkimeti ózi múddeli tarap bolǵandyqtan, keden beketterin rekonstrýktsiialaýdy qoldaý otyr. Sebebi olar bizdiń keden arqyly Eýropaǵa tez eksporttaýdy kózdep otyr. Sondyqtan da olardyń sharty boiynsha osy baǵytqa ǵana nesie bermek. Biz aýyl sharýashylyǵyna mundai nesieni alyp, táýekelge bara almaimyz», - dedi UEM ókilderi.
Áli Bektaev alynatyn qaryzdyń el ekonomikasyna paidasyn surady.
«Qaryz alyp, osynsha salǵannan keiin, osy jumystar atqarylǵannan keiin ekonomikaǵa qandai paida keledi? Qandai qosymsha túsimder bolady? Bizdiń biýdjetke salyq jaǵynan, kedendik túsimder jaǵynan», - dedi depýtat.
Bul suraqqa ministrmen birge zań jobasyn usynýǵa kelgen vedomstvo ókili jaýap berdi.
«Jańa atap ótkendei, búgin Ózbekstan tarapynadaǵy keden beketterinde úlken keptelis bolyp jatyr. Ol jańaǵy Ózbekstannyń syrtqy saýdasyna damýyna bailanysty bolyp jatyr. Al bizdiń Qazaqstandaǵy ekonomikalyq áseri ol aqyly joldar arqyly kólikterdiń júrýinen alynatyn alymdar kóbeiedi, ekinshiden, tek Qytai tarapynan biz 200 mlrd-qa jýyq qosymsha salyqtar men kedendik tólemder túsedi dep boljap otyrmyz. Bular – qosymsha túsimder. Infraqurylymnyń damýyna, Batys Eýropa-Batys Qytai tas jolynyń múmkindikteri keńeiip, joldaǵy servistik qyzmetter damyp, salyqtar túsedi dep boljam jasap otyrmyz», - dedi ol.
Bektaev «Sonyń naqty esebi bar ma?» dep taǵy da qarsy suraq qoidy.
«Kedendik tólemder men salyqtar jónindegi 300 mlrd somany ǵana aita alamyn. Orta esepen ár júk kólik quraly Qazqastannan ótken kezde, 100 kilometrge 7-8 myń teńgedei tólem qaldyrady dep boljap otyrmyz. Ol jańaǵy janar-jaǵarmai, joldaǵy servistik qyzmetter», - dedi minsitrlik ókili.
Depýtat «Bul qazirshe jalpylama sóz ǵoi, meniń aitqanymdy túsindińiz ǵoi. Zaim alý úshin sizderde esep bolýy kerek, myna qaryzdy alamyz, jumsaimyz, osynsha paida bolady dep. Osyny mynadai joldarmen qaitaramyz. Bul jai ǵana bireýdiń aspannan túsken qaryzy emes qoi, memlekettik qaryz. Sondyqtan sizderde naqty esep bolý kerek. Sizder qarjy ministrligisizder. Esepterińiz bar ma?», - dep naqtylaǵysy keldi.
«Jańaǵy 300 mlrd-tan basqa bizde naqty esepter jasalǵan joq, qosymsha salyqtar men tólemder», - dep qosty Qarjy ministrliginiń ókili.
