Densaýlyq saqtaý ministri Eljan Birtanov Qazaqstanǵa keletin azamattar úshin engiziletin karantin tártibin túsindirip berdi, dep habarlaidy QazAqparat.
«Álemdegi 41 memleket Ýhannan kelgenderge ǵana emes, búkil Qytaidan kelgen azamattar úshin karantin tártibin engizip jatyr. Biz de búginnen bastap Qytaidaǵy infektsiianyń taralý qaýpiniń aldyn alý úshin osy sharany qabyldadyq», - dedi Eljan Birtanov OKQ-da ótken baspasóz máslihatynda.
Sonymen qatar ministrdiń aitýynsha taǵy birqatar elde infektsiianyń qarqyndy túrde taralyp jatqan jaiy bar.
«Sol sebepti sanitarlyq dárigerdiń qaýlysynda epidemiialyq turǵyda jaisyz elderdi ekinshi sanatqa kirgizdik. Ol elderdiń qataryna 10 patsienti bar memleketter ǵana emes, aýrýdy juqtyrý sipaty jaǵynan erekshelengen elder de engizildi. Osyǵan bailanysty birqatar elderge nazar aýdaryp otyrmyz. Meditsinalyq qyzmetkerler 14 kún monitoring jasaidy. Kez kelgen azamat shekarany kesip ótken kezde biz onyń málimetterin turǵylyqty mekenjaiy boiynsha aýrýhanalarǵa tapsyramyz», - dedi ol.
Eger sheteldik azamat Qazaqstan aýmaǵyna kelse, ol jatqan qonaq úige meditsinalyq qyzmetker kelip, temperatýrasyn ólshep, jaǵdaiyn baqylaýǵa alady.
«Budan keiin qashyqtyqtaǵy monitoring qońyraý arqyly júrgiziledi. Bul sharalardyń bári de eń aldymen azamattardyń óz densaýlyǵy úshin jasalýda. Eń birinshi kezekte halyq densaýlyǵy úshin qolǵa alynǵan jumystar legi – osy», - dedi Eljan Birtanov.
