Qazaqstan úkimeti Qytaidan eki el shekarasyndaǵy qazaqstandyq ótkizý pýnktin jetildirý úshin 2 milliard iýan, iaǵni, 100 milliard teńgege jýyq qaryz alýdy josparlap otyr. Bul týraly Tengrinews.kz habarlady.
Qos el arasyndaǵy kelisimdi ratifikatsiialaý týraly zań jobasy Májiliste qaraldy. Oǵan 2018 jyldyń maýsymynda Qazaqstan Prezidenti Nursultan Nazarbaevtyń Beijińge sapary barysynda eki el basshylary qol qoiǵan bolatyn. Osy kelisim boiynsha Qytaidyń eksport-import banki Qazaqstan úkimetine Qytai jáne Ózbekstanmen shekaradaǵy qazaqstandyq ótkizý pýnktterin jetildirý jáne tehnikamen jabdyqtaý úshin 2,062 milliard qytailyq iýandi jeńildetilgen nesie túrinde beredi.
Premer-ministrdiń birinshi orynbasary - qarjy ministri Álihan Smaiylovtyń aitýynsha, Qytai 20 jylǵa 2 paiyzben 100 milliardqa jýyq teńge qaryz beredi.
"Eýraziialyq ekonomikalyq odaqtaǵy ishki shekaralardyń qazaqstandyq ýchaskelerindegi ótkizý pýnktteriniń kedendik infraqurylymyn damytý qajet. Qazirgi infraqurylym ósip kele jatqan adamdar legin birqalypty ári jyldam ótkizýge múmkindik bermeidi. Mysaly, Qazaqstan men Ózbekstan shekarasyndaǵy jaǵdaidy aitýǵa bolady. Qazaqstan jaǵyndaǵy ótkizý pýnkti aldynda kún saiyn 70-300 avtokólik jinalady, olar úsh kúnge deiin kezekte turady", - deidi Smaiylov Májiliste.
Qazaqstandaǵy ótkizý pýnktterinde qozǵalystar legin fizikalyq túrde bólip tastaý josparlanyp jatyr, avtokólikterdiń toqtamai qozǵalýy úshin tehnikalyq baqylaýdyń biryńǵai avtomattanyrylǵan dálizderi qondyrylady.
"Osy qaryz aiasynda toǵyz avtokólik jáne bir temirjolǵa arnalǵan ótkizý pýnktin jetildirip, tehnikalyq jabdyqtaý josparlanyp otyr. Bul jobany osy jyldyń sońyna qarai bastap, 2022 jyly aiaqtaimyz", - dedi Smaiylov. Jýrnalisterdiń suraqtaryna jaýap bergen ministr qaryzǵa alynǵan somanyń 70 paiyzy ótkizý pýnktterin tehnikalyq jabdyqtaý úshin qytailyq qurylǵylardy satyp alýǵa ketetinin aitty. "Nesiege bailanysty qytailyq Nuctech kompaniiasynan qurylǵylar alamyz. Bul - óz qurylǵylaryn 122 elge usynǵan álemge tanymal qytailyq kompaniia. Olardyń keden salasyndaǵy qurylǵylary amerikalyq jáne eýropalyq analogtardan kem emes, al baǵasy - arzandaý. Tańdaýymyzdyń sebebi osy boldy", - dedi ol.
"Dollarmen berip, jylyna 3-4 paiyzdyq nesie usynatyn basqa da qarjy uiymdarymen salystyrǵanda, bizge munda 20 jylǵa 2 paiyzben iýan arqyly berilip otyr. Iýan da álsireitin kezder bolady, sondyqtan biýdjetke salmaq qatty túspeidi. Eger biz respýblikalyq biýdjetten qarjylandyrsaq, mundai jobalar biýdjetke úlken qysym jasaidy. Sebebi bir sátte úlken kólemde qarjy quiý kerek bolady. Jeńildetilgen nesie alsaq, shyǵyndarymyz az bolyp, ol 20 jylǵa bólinedi. Qytaidyń aldynda memlekettik qaryzymyz joq. 1,2 milliard dollar kóleminde kepildendirilgen qaryzymyz bar, biz ony avtokólik joly jobasyn júzege asyrý úshin alǵanbyz. Ony qazir tólep jatyrmyz", - dedi birinshi vitse-premer.
