Qazaqstan-Qytai shekarasyndaǵy Dostyq stantsiiasynda júk tieý terminaly salynady, dep habarlaidy QazAqparat.
Almaty oblysynyń ákimi Qanat Bozymbaevtyń sózinshe, eksporttyq, sondai-aq importtyq baǵytta júkterdi aýystyryp tieýge, saqtaýǵa jáne qoimalaýǵa baǵyttalǵan aýqymdy jobalardy júzege asyrý josparlanýda. Mysaly, «DAR RAIL Infrastructure» kompaniiasynyń Dostyq stantsiiasyndaǵy quny 25 mlrd teńge bolatyn, 150 jumys ornyn quraty júk tieý terminalynyń qurylysyn aitýǵa bolady. Joba Qazaqstan-Qytai shekarasy arqyly ótetin jylyna 9 mln.tonnaǵa deiin júk pen 300 myń konteinerdi tieýdi, saqtaýdy jáne qoimalaý kózdelgen.
Mineraldyq shikizatty óndirý jáne qaita óńdeý salasyna da basa nazar aýdarylatyn bolady. Oblysta ýran-kómir ken oryndarynyń biregei qorlary, sondai-aq marganets, volfram, altynnyń bekitilgen qorlary, paidaly qazbalardyń úlken kólemdi ken oryndary bar.
«Durys jumys júrgize otyryp, týrizm salasyn ekonomikanyń tolyqqandy draiverine ainaldyrýǵa bolady. Almaty taý klasteri, Alakól jáne Balqash jaǵalaýlaryn, ulttyq tabiǵi saiabaqtardaǵy ekologiialyq týrizmdi damytý basymdylyqqa ie salalar bolyp tabylady. Almaty taý klasteri aiasynda jalpy somasy 546,7 mlrd.teńgege 8 jobany júzege asyrý jáne 6 myńnan astam jumys ornyn qurý josparlanýda. 2025 jylǵa qarai jalpy óńirlik ónimdegi týrizmniń úlesi 6% - ǵa deiin artady», - dedi Almaty oblysynyń ákimi Qanat Bozymbaev.
Jalpy oblystyń 2025 jylǵa deiingi investitsiialyq portfeli qurylyp, oǵan 19 myń adamǵa jumys beretin jalpy quny 2,8 trln teńge bolatyn 289 joba engizildi.
