22 mamyrda Qazaqstan aýyl sharýashylyǵy ministrligi Qyrǵyzstannan kartop, alma men qurma ákelýge salynǵan tyiymnyń kúshin joidy. Qyrǵyzstan úkimetiniń baspasóz qyzmetine siltegen Azattyqtyń Qyrǵyz qyzmeti tyiymdy alyp tastaý týraly kelisim jasalǵanyn habarlady.
Qazaqstan tarapy mundai tyiymdy 19 aqpanda qoiǵan. Eldiń aýyl sharýashylyǵy ministrligi Qyrǵyzstannan tutynýǵa arnalǵan jáne tuqym retinde qoldanylatyn kartopty, alma men qurmany, Ózbekstannan anardy alyp kirýge tyiym salǵan. Ministrlik buǵan "osy elderden keletin taýarlar arasynda talapqa sai emes ónimniń jiilep ketýi sebep" degen.
Sol kezde Qyrǵyzstan aýyl sharýashylyǵy ministrligi Nýrbek Mýrashev "Qazaqstan tarapy sý kólemin baqylap otyrý úshin Orto-Tokoi jáne Kirov bógenderine baqylaý kamerasyn ornatýdy surady. Bishkek buǵan kelispegen soń Nur-Sultan birneshe aýyl sharýashylyǵy taýaryna shekteý qoidy" dep málimdegen.
28 aqpanda Nur-Sultanda ótken úkimetaralyq kelissózde Qazaqstan tarapy tyiymdardy alyp tastaýǵa daiyn ekenin aitqan. Eki el kelissózden soń Qyrǵyzstanda taýarlardy tekserýdi kúsheitý boiynsha jol kartasyna qol qoiǵan. 17 pýnktiden turatyn qujattaǵy alǵashqy mindettemelerdi Bishkek biylǵy shildege deiin oryndaýy tiis.
