Qazaqstan Eýraziia ekonomikalyq odaǵynyń zań erejelerin buzbaidy, alaida taýar qujattarynyń talapqa tolyq sai bolǵanyn talap etedi. Bul týraly 5 sáýirde Nur-Sultan qalasynda ortalyq kommýnikatsiialar qyzmetinde ótken baspasóz jiynynda Qazaqstan qarjy ministrligi memlekettik kiris komiteti tóraǵasynyń orynbasary mindetin atqarýshy Qýat Rahimov málimdedi, dep jazady Azattyq.
"EAEO normalaryn buzyp jatyr degenge kelsek, men munymen kelispeimin. Biz syrtqy shekara, stavka, baj, deklaratsiianyń ortaq normalary týraly sóz qozǵap otyrmyz. Bul bizdiń bárimizge de qatysty. Tek keibireýler taýar qunyna qatysty ózderiniń baqylaý fýnktsiialaryn tolyq oryndamai otyr degen kúdigimiz bar", - dedi Raqymov OKQ-de ótken baspasóz máslihatynda.
Qarjy ministrligi ókili janama salyqqa bailanysty problema baryn aitty. Rahimovtyń túsindirýinshe, Qyrǵyzstannan Qazaqstanǵa taýar ótkizgen kezde salyq Qazaqstan jerinde tólenýi tiis. Onyń pikirinshe, Qyrǵyzstannan Reseige ketip bara jatyr dep kórsetilgen jekelegen taýar túrleri is júzinde Qazaqstannan shyqpai qalyp qoiady.
"Janama salyq tóleý óte úlken problemaǵa ainalyp otyr. Kelesi bir másele júk-kólik qujattaryna bailanysty. Olarda bir taýardy kórsetip jazǵanymen is júzinde basqadai bolyp shyǵady. [Taýar] sanyn, baǵasy men kólemin azaityp kórsetedi, al bul taǵy da sol janama salyqqa áser etedi" dep habarlady Rahimov.
Qazaqstan qarjy ministrliginiń aqparaty boiynsha, 27 naýryzdan 4 sáýirge deiin Qazaqstan aýmaǵyna qyrǵyz taýaryn tiegen 265 avtokólik, tranzittik baǵyttaǵy 455 júk kóligi kirgen.
Buǵan deiin Qyrǵyzstan Premer-ministri Mýhammedkalyi Abylgaziev Úkimet otyrysynda qazaq-qyrǵyz shekarasynda qalyptasqan ahýalǵa bailanysty qazaqstandyq áriptesi Asqar Maminmen "úsh ret kelissóz" ótkizgenin habarlap, eki taraptyń kelisiminiń nátijesi jaqyn ýaqytta belgili bolady dep málimdegen edi.
"Biz Eýraziia ekonomikalyq odaǵy aiasynda qol qoiylǵan kelisimderdiń oryndalýyn talap etemiz. Men Qazaqstan premer-ministri Asqar Maminmen úsh ret kelissóz ótkizdim. Qyrǵyzstan delegatsiiasy Qazaqstanda kelissózder júrgizdi jáne biz kelisimge qol jetkizdik, onyń nátijesin jaqyn kúnderi kóretin bolamyz. Biz kelisimniń oryndalýyna kúsh salamyz. Jáne úkimet túk istemei otyr dep aitýshylarǵa men ekonomikalyq máselelerdi sheshý - baisaldy kelissóz ben asyqpai-abdyqpai muqiiat oilanýdy qajet etedi" dedi Abylǵaziev.
3 sáýirde Qyrǵyzstan ekonomika ministrligi Qazaqstan jaǵynyń shekaradaǵy is-áreketi EAEO normalaryna qaishy dep málimdeme taratqan edi. Kórshiles eki el osy odaqqa múshe.
Munyń aldynda Qyrǵyzstan "Aq tilek - avtodorojnyi" ótkizý beketinde 200-den astam júk kóligi Qazaqstan aýmaǵyna óte almai bógelip tur dep habarlaǵan. Qazaqstan 19 naýryzdan bastap shekaradaǵy tekseristi kúsheitken.
Qazaqstan taraby keptelisti qyrǵyzstandyq júk tasymaldaýshylardyń keden tekserisinen ótýge qulyqsyzdyǵymen túsindirgen edi.
