Qazaqstandyq komandalar Qytaiǵa jetip, Olimpiadalyq qalashyqtarǵa sátti ornalasty, dep habarlaidy Olympic.kz.
Ózderińiz biletindei, Qysqy Olimpiada oiyndary úsh klasterde, atap aitqanda, Beijiń, Chjantsziakoý jáne Iantsin aimaqtarynda ótedi.
Muz aidyndyndaǵy barlyq jarys Beijińde ótedi. Qytai astanasyndaǵy Olimpiadalyq qalashyqta konkimen júgirý men short-trekten Qazaqstan quramalary ornalasty. Olimpiadalyq kartadaǵy eń alys aimaq kórshi Hebei provintsiiasynda ornalasqan taýly Chjantsziakoý boldy. Onda fristail-mogýl, tramplinnen shańǵymen sekirý, shańǵy jarysy jáne shańǵy qossaiysy boiynsha qurama komandalar jaǵasty. Al Iantsinde taý shańǵysynyń sportshylary ornalasty.
«Beijińge kelip, mindetti PTR synaqtarynan ótkennen keiin birden Olimpiadalyq qalashyqtaryna bardyq. Beijiń men Chjantsziakoý arasyndaǵy jol 3 saǵatqa sozylady. Bizdiń fristail-mogýl, tramplinnen shańǵymen sekirý jáne shańǵy qosaiysy qurama komandalar osynda boldy. Basqa komandalardy kútemiz. Bári oidaǵydai. Munda aýa raiy kún ashyq bolǵanymen, sýyqtaý. Al sportshylardyń kóńil kúii birqalypty, jaqsy.
Bizdiń qalashyqqa ornalasýymyz Halyqaralyq Olimpiada komitetiniń prezidenti Tomas Bahtyń Olimpiadalyq qalashyqqa saparymen tuspa-tus keldi. Ol sportshylarmen tildesip, aldaǵy jarystarda sáttilik tiledi. Olimpiada oiyndary – kez kelgen sportshynyń ómirindegi óte mańyzdy oqiǵa. Bul kezdesý bizdiń sportshylardy burynǵydan da qanattandyryp, shabyttandyrdy dep oilaimyn», - dep atap ótti Qazaqstan Respýblikasy Ulttyq shańǵy qaýymdastyǵynyń bas hatshysy Asqar Valiev.
Kezdesý barysynda olimpiadalyq dástúr de saqtalyp, HOK basshysy sportshylarmen estelik tósbelgilerimen almasty.
«Olimpiadalyq qalashyqqa kelgendegi sezimim erekshe, ony sózben aityp jetkizý múmkin emes. Munda barlyǵy óte joǵary dárejede uiymdastyrylǵan. Komandamyz da óz kezeginde bul startqa tas túiin daiyn. Jan-jaqty, psihologiialyq jáne fizikalyq turǵydan daiyndaldy. Alǵashqy kúni-aq HOK basshysy Tomas Bahpen kezdestik. Ol maǵan bir-eki simvoldyq suraq qoiyp, kóńil-kúiimdi, qobaljý bar-joǵyn surady. Sondai-aq, árine, sáttilik tiledi», - dep bólisti bizben fristail-mogýldan Qazaqstan quramasynyń múshesi Anastasiia Gorodko.
Aita keteiik, Olimpiadaǵa Qazaqstan quramasynyń sportshylarynyń ishinde birinshi bolyp jarys jolyna mogýlshylar shyǵady. Mogýl boiynsha irikteý jarystary Olimpiada oiyndarynyń ashylý saltanatyna deiin, 3 aqpanda ótedi.
