Kórkem gimnastikadan Tashkentte ótip jatqan litsenziialyq Aziia chempionatynda qazaqstandyq Alina Ádilhanov chempion atanyp, Tokio Olimpiadasyna joldama aldy, dep habarlaidy "Ult aqparat".
QR Ulttyq Olimpiada komitetinen málim etkendei, Alina Ádilhanova kópsaiys qorytyndysy boiynsha 95.15 upai jinap, jeńiske jetti. Ekinshi jáne úshinshi oryndy ózbekstandyqtar Tahmina Ikromova (92.90) men Ekaterina Fetisova (90.85) ielengen.
Qazaqstan atynan synǵa túsken taǵy bir sportshymyz Adilia Tilekenova jetinshi orynǵa taban tiredi.
Halyqaralyq gimnastika federatsiiasy litsenziialyq Aziia birinshiligin ótkizýdi sońǵy sátte sheship, týrnir 6 maýsymda bastalǵan bolatyn.
Jarys erejesi boiynsha, tek jeńimpaz atanǵan sportshyǵa Olimpiada joldamasy tabystalady.
Osylaisha, sary qurlyqtan Tokio oiyndaryna beriletin jalǵyz litsenziiany Alina Ádilhanova enshilep otyr. Buǵan deiin Alina jekelei synda óner kórsetip, dop jáne shyǵyrshyq jattyǵýynda kúmis, urshyqpen jattyǵýda altyn júlde jeńip aldy.
Alina Ádilhanova 2001 jyly 26 qańtarda dúniege kelgen. 2018 jylǵy Aziia oiyndarynda komandalyq jáne jekelei synda altyn júldeger atanǵan.
Aita keteiik, búginge deiin Qazaqstan sporttyń 25 túrinen Olimpiadaǵa 63 joldama jeńip aldy.
