2019 jyl – ǵalamshardaǵy meteobaqylaý júrgizýdiń búkil tarihynda eń jyly onjyldyqtaǵy ekinshi jyl boldy. Kóptegen klimatologtardyń pikirinshe, ortashajyldyq temperatýranyń kóterilýine atmosferadaǵy kómirqyshqyl jáne basqa da parniktik gazdar quramynyń artýy áser etip otyr, dep habarlaidy "Ult aqparat" Energyprom.kz saityna silteme jasap.
Parniktik gazdar, jáne eń aldymen kómirqyshqyl gaz ǵalamshardaǵy birkelki klimatty qalyptastyrady: olarsyz ortasha aýa temperatýrasy -18 C bolatyn edi. Qazbaly otyndy (kómir, munai jáne gaz) jaǵýdan aýada kómirqyshqyl gaz kólemi aitarlyqtai artyp, klimattyń jylynýyna sebep bolady.
Ǵalamshar tarihyna tán klimattyń ózgerýi men túrli klimattyq kezeńderge qaramastan, qazirgi kezde baqylanyp otyrǵan ortasha temperatýra ósimi jyldamdyǵy sońǵy 2 million jyl barysynda bolǵan emes, dep habarlandy aǵymdaǵy jyldyń 28 qazanynda ótken Green webinar (IGTIPC.ORG) atty klimat boiynsha ashyq vebinarda.
Klimattyń jylynýy uzaq kezeńderge sozylǵanymen qazirgi kezde baqylanyp otyrǵan aýa temperatýrasynyń kúrt kóterilýi sońǵy elý jylda aiqyn baiqalyp otyr.
Bul rette 2016 jyly Qazaqstan parniktik gazdardyń shyǵarylýyn 2030 jylǵa qarai qysqartýǵa jáne jahandyq temperatýra ósimin 2 C tómen ustap turýǵa baǵyttalǵan klimat boiynsha Parij kelisimin bekitken.
Qazaqstan úshin halyqaralyq klimattyq kelisimderdi iske asyrý óte mańyzdy, sebebi «Qazgidromet» RMK málimetinshe, sońǵy otyz jyldyń ishinde Qazaqstandaǵy klimat álem boiynsha ortasha kórsetkishten eki esedei jylynǵan.
