2017 jyldyń 1 qazanynda ótken jyldyń sáikes kezeńimen salystyrǵanda Qazaqstan halqynyń sany 231 myń adamǵa kóbeidi. Bul týraly "Ult aqparat" QR Ulttyq ekonomika ministrliginiń baspasóz qyzmetine silteme jasap habarlaidy.
«2017 jylǵy 1 qazanda elimizdegi halyq sany 18 096,9 myń adamdy qurady. Onyń ishinde qalalyqtar - 10 383, 3 myń (57,4%), aýyldyqtar - 7 713,6 myń adam (42,6%). 2016 jylǵy 1 qazanmen salystyrǵanda halyq sany 231,3 myń adamǵa nemese 1,3% ósti», - delingen vedomstvo aqparatynda.
AHAT organdary usynǵan azamattyq hal aktileri jazbalaryndaǵy málimetterdi óńdeý nátijesinde 2017 jylǵy qańtar-qyrkúiekte dúniege kelgender sany 293,3 myń adamdy quraǵan. Bul 2016 jylǵy qańtar-qyrkúiekke qaraǵanda 6,2 paiyz az.
2017 jylǵy qańtar-qyrkúiekte respýblika halqynyń tabiǵi ósimi 2016 jylǵy qańtar-qyrkúiekpen salystyrǵanda 18 myń adamǵa nemese 8,5 paiyzǵa kemip, 194,9 myń adamdy qurady.
Qarastyrylyp otyrǵan kezeń ishinde 98,4 myń adam ómirden ozǵan. Bul 2016 jylǵy qańtar-qyrkúiekke qaraǵanda 1,3 paiyzǵa az.
2017 jylǵy qańtar-qyrkúiekte respýblikada 1 jasqa deiingi 2386 náreste ólimi tirkeldi. 2016 jylǵy qańtar-qyrkúiekpen salystyrǵanda, 1 jasqa deiingi shetinegen náreste sany 13 paiyzǵa kemidi. Náreste ólim-jitiminiń negizgi sebebi - perinataldyq kezeńde paida bolatyn jaǵdailar. Odan 2017 jylǵy qańtar-qyrkúiekte 1195 náreste qaitys bolyp, náresteler arasyndaǵy jalpy ólim sanynyń 50,1 paiyzyn qurady. Týa bitken aýytqýlardan 574, tynys organdary aýrýlarynan - 151 jáne jazataiym jaǵdaidan, ýlanýdan jáne jaraqattan - 129 náreste qaitys boldy.
