Qazaqstan halqynyń sany 18 mln 917 myńnan asty. Bul týraly QR Strategiialyq josparlaý jáne reformalar agenttiginiń Ulttyq statistika biýrosynan málim etti, dep habarlaidy "Ult aqparat".
«2021 jylǵy 1 naýryzda elimizdegi halyq sany 18 917,2 myń adamdy qurady. Onyń ishinde qalalyqtar – 11 187,2 myń (59,1%), aýyldyqtar – 7 730,0 myń adam (40,9%). 2020 jylǵy 1 naýryzben salystyrǵanda halyq sany 245,3 myń adamǵa nemese 1,3 paiyz ósti», - delingen biýro aqparatynda.
Vedomstvo málimetinshe, 2021 jylǵy qańtar-aqpanda respýblika halqynyń tabiǵi ósimi 2020 jylǵy qańtarmen salystyrǵanda (42,0 myń adam) 0,2 paiyzǵa artyp, 42,1 myń adamdy qurady. Tabiǵi ósimniń jalpy koeffitsienti 1000 adamǵa shaqqanda - 13,71 adam.
AHAT organdary usynǵan azamattyq hal aktileri jazbalaryndaǵy málimetterdi óńdeý nátijesinde, 2021 jylǵy qańtar-aqpanda týǵandar sany 65,7 myń adamdy qurady. Bul 2020 jylǵy qańtar-aqpanǵa (64,7 myń adam) qaraǵanda 1,6 paiyzǵa kóp. Týýdyń jalpy koeffitsienti - 1000 adamǵa 21,41 týǵanǵa teń.
Qarastyrylyp otyrǵan kezeńde qaitys bolǵandar sany - 23,7 myń. Bul 2020 jylǵy qańtar-aqpanǵa (22,7 myń adam) qaraǵanda 4,2 paiyzǵa kóp. Ólim-jitimniń jalpy koeffitsienti 1000 adamǵa 7,70 qaitys bolǵandy quraidy.
2021 jylǵy qańtar-aqpanda respýblikada 1 jasqa tolmaǵan 517 náreste shetinegen. 2020 jylǵy tiisti kezeńmen salystyrǵanda sábi ólimi (583 shetinegen) 11,3 paiyzǵa azaidy.
