Qorǵa aýdarylǵan qarjy ashyq jariia etilip, halyq baqylap otyra alady. Bul týraly «Qazaqstan halqyna» qorynyń basqarma tóraǵasy Bolat Jámishev málim etti, dep habarlaidy QazAqparat.
Bolat Jámishev ortalyq kommýnikatsiialar qyzmetinde onlain ótken baspasóz máslihatyna qatysyp, qor qyzmetine qatysty basty jaittardy tarqatyp berdi.
«Qorǵa túsken qarajat kólemin turaqty túrde halyqqa jariia etip turamyz. Onyń ishinde biznes ókilderimen qatar iri kompaniialar da bar. Buǵan deiin 2 ret qorǵa qandai kólemde aqsha túsip jatqany týraly aqparat bergen bolatynbyz. Qaiyrymdylyqtan bólek, qorǵa lotereia qyzmeti operatorlarynan qarajat túsedi. Sol siiaqty Úkimetpen anyqtalǵan utys tigý ortalyqtary men basqa da tabys kózinen qarajat aýdarylady. Bul jumysty endi qolǵa alamyz», - dedi Jámishev.
Tóraǵanyń aitýynsha, jeke tulǵalar qor qyzmetiniń jandanýyna erikti túrde qol ushyn sozyp jatyr.
«Biz bireýdi qinap, erkinen tys aqsha aýdarýǵa májbúrleýge qarsymyz. Qaiyrymdylyq - adamnyń óz qalaýymen jasalatyn shara. Memlekettik organ qyzmetkerleriniń qorǵa aqsha jinap berýine qatysty shaǵymdy estip jatyrmyn. Árine, biz de qarsymyz. Eger azamat ózi solai sheship, jaqsylyq jasaý nietimen aýdarsa, onda is basqa», - deidi ol.
