Qazaqmys pen KazMinerals kompaniialar toby "Qazaqstan halqyna" qoryna 25 milliard teńge aýdardy. Osylaisha, eki kompaniia Prezident Qasym-Jomart Toqaevtyń bastamasyn qoldap otyrǵanyn málimdedi, dep habarlaidy Sputnik Qazaqstan.
"2014 jylǵy qaita qurylymdaýǵa deiin óz qyzmetin ortaq brendpen júrgizgen Qazaqmys pen KAZ Minerals áleýmettik máselelerdi sheshý jolynda Qazaqstan halqyn qoldaýǵa jáne halyqtyń áleýmettik osal toptaryna kómektesýge daiyn", - delingen resmi habarlamada.
Buǵan deiin buqaralyq aqparat quraldarynda jariialanǵan aýdarymdardyń ishinde bul áleýmettik qorǵa quiylǵan eń iri soma bolyp sanalady. 20 qańtarǵa deiin tanymal kásipkerler, zańdy tulǵalar men qarapaiym halyqtan barlyǵy 19,5 milliard teńge túsken.
Sonyń ishinde "Kaspi bank" AQ quryltaishylary Viacheslav Kim men Mihail Lomtadze – 10 mlrd teńge, "Halyq" qaiyrymdylyq qory - 2 mlrd teńge, "Stepnogorsk taý-ken kombinaty" JShS - 350 mln teńge jáne taǵy basqa kásiporyndar bar. Sondai-aq, Nursýltan Nazarbaev qorynan 500 million teńge aýdaryldy.
"Qazaqstan halqyna" qorynyń basshysy Bolat Jámishevtiń esebine sáikes, 150 milliard teńgege deiin aqsha túsýi kerek.
Aita keteri, Memleket basshysy Qasym-Jomart Toqaevtyń tapsyrmasymen "Qazaqstan halqyna" qory qurylǵan bolatyn. Qordyń aqshasy esebinen densaýlyq saqtaý, bilim, áleýmettik qoldaý salasyndaǵy naqty problemalar sheshiledi. Sondai-aq qaza bolǵan politseiler men áskeri qyzmetshilerdiń otbasylaryna kómek beriledi.
