«Qazaqstan halqyna» qorynyń tóraǵasy Bolat Jámishev qor jumysy týraly aita kele, eń aldymen kimderge kómek kórsetiletinin málim etti, dep habarlaidy QazAqparat.
«Árine, qor halyqtyń áleýmettik jaǵdaiyn jaqsartý jolynda jumys isteidi. Degenmen bir qorǵa senim artyp, sodan eldiń jaǵdaiy jaqsaryp ketedi degen qate túsinik. Biz memlekettik organdar iske asyryp jatqan áleýmettik qoldaý sharalaryn qaitalamaimyz. Qazir biz uiymdastyrý jumysymen ainalysyp jatyrmyz. Sonymen qatar alǵashqy kómek berý sharasyn da qolǵa aldyq. Bizdiń alǵashqy qaiyrymdylyq jobamyz - jappai tártipsizdik kezinde qyzmet barysynda qaza bolǵan quqyq qorǵaý jáne áskerilerdiń otbasyna kómek. Jáne aýyr dertke shaldyqqan balalarǵa kómek kórsetkimiz keledi. Búginde jumys osy baǵytta júrip jatyr. Árine, memleket tarapynan kómek kórsetilip jatyr, degenmen qoldaý jaǵy jetpei jatqan jandar da barshylyq», - dedi Bolat Jámishev «Habar 24» arnasynyń «Oshakbaev LIVE» telebaǵdarlamasynyń efirinde.
Sondai-aq, efir qonaǵy qordyń shtatyna qatysty túsinik berdi.
«Qordyń shtaty úlken emes, bar-joǵy 25 adam. Eskeretin jait, qorǵa kúnine eldiń túkpir-túkpirinen qanshama qarajat túsip jatyr. 25 adam onyń bárine esep júrgize almaidy. Sondyqtan biz óńirler boiynsha qoǵamdyq qaiyrymdylyq uiymdarymen birigip jumys isteitin bolamyz. Biz olardy qarjylandyrmaimyz, tek seriktes retinde jumys isteimiz. Iaǵni atalǵan qoǵamdyq uiymdar bizge kómekke muqtaj jandar men olardyń qujattaryn rásimdep beredi. Al biz bárin tekserip, qaiyrymdylyq jasaý týraly sheshim qabyldaimyz», - deidi ol.
