© Sputnik / Timýr Batyrshin
«Qazaqstan halqyna» qorynyń basqarma tóraǵasy Bolat Jámishev jańadan qurylǵan qaiyrymdylyq uiymynyń qyzmetin synap, kúmánmen qaraýshylarǵa jaýap berdi, dep habarlaidy QazAqparat.
«Qor jumysyna qatysty «bizneske qosymsha salyq salýdyń bir túri» degen qaýeset tarap jatyr. Osyǵan orai aitarym, bul - salyq emes, ár adam men mekemeniń óz erkimen jasalatyn qaiyrymdylyq sharasy. Búginde bizdiń qorǵa iri biznes ókilderi men iri kásiporyndardan qarjy túsip jatyr», - dedi Bolat Jámishev OKQ-de onlain ótken baspasóz máslihatynda.
Qor basshysynyń aitýynsha, salyq pen qaiyrymdylyq jasaýdy shatastyrmaý qajet.
«Qazirgi ýaqytta kóptegen biznes ókilderi túrli qaiyrymdylyqpen ainalysyp jatyr. Olar qaiyrymdylyq sharasyn odan ári jalǵastyrady degen oidamyn. Bizdiń qordyń jumysyna júktelip otyrǵan júk jaýapty. Jáne qorǵa jeke qarajatyn bólgen azamattarǵa onyń qaida, qalai jumsalyp jatqanyn bilý de mańyzdy bolsa kerek. Túsken qarajatty tiisti baǵytqa jumsaý, qor jumysyn ońtailandyra túsetini ras. Biz osy tusta qor demeýshileriniń keńesin qurýdy josparlap otyrmyz. Atalǵan keńeste qordyń jumys strategiiasy ázirlenetin bolady», - deidi ol.
