Elordalyq kompaniialar Qorǵanys ministrligi úshin arnaiy kiim tigý boiynsha memlekettik tapsyrysty oryndai almaitynyn aitýda. Sebep – naryqtaǵy jaǵdaiǵa bailanysty mata-materialdyń kúrt qymbattaýy, dep habarlaidy QazAqparat.
Nur-Sultan qalasynda Reseige sanktsiialar paketiniń engizilýi jáne onyń Qazaqstan ekonomikasyna áserine qatysty «Atameken» ulttyq kásipkerler palatasy qurǵan óńirlik jedel shtabtyń otyrysy ótti. Kásipkerler sanktsiialar saldarynan qandai problemalar men qaterlerge tap bolǵanyn aityp berdi.
Kásipkerler mata-materialdyń qymbattaýynan jáne valiýta baǵamynyń ósýinen arnaiy kiim, mektep formasyn tigý boiynsha kelisimsharttyq mindettemelerdi oryndai almaitynyn bir aýyzdan jetkizdi.
«BMC Sales» basshysy Asqar Basheevtiń aitýynsha, shikizatty jetkizýshiler valiýta baǵamynyń qubylýyna bailanysty kelisimshart jasasýdan tartynyp otyr. «Alda mektep naýqany kele jatyr, biz tige almaimyz, oǵan resýrs tapshy. Jetkizýshiler kelisimshart jasaýǵa asyqpaidy. Óitkeni erteń baǵa ózgerip ketpesine kepildik joq», – deidi ol.
«Progress» tigin fabrikasy» JShS ókili Nurjan Mankin onyń fabrikasy Qorǵanys ministrligimen 2021 jyldyń kúzindegi baǵamen kelisimshart jasaǵanyn aitty. Al qazir Qytai jáne Reseide óndirilgen materialdyń baǵasy 30-40% qymbattady. «Qazirgi ýaqytta biz kelisimshartty oryndai almaimyz», – dep atap ótti ol.
Onyń áriptesi, «KazSPO-N» JShS bas direktory Elena Svechnikova qazirgi jaǵdaida Qorǵanys ministrligimen josparlanǵan kelisimshart tiimsiz bolǵandyqtan, odan bas tartýǵa májbúr ekendigin aitty. «Alaida bizdi isin adal oryndamaityn jetkizýshiler reestrine qosady dep ýaiymdaimyz. Bizge osy baǵytta kómek berseńizder?», – dedi kásipker.
Jeńil ónerkásip salasyndaǵy osy máseleni basqa da kompaniialar kóterdi.
Al «Eurasia Group Kazakhstan» JShS ókilderi Eýropa jáne AQSh-tan kelýi tiis aýyl sharýashylyǵy tehnikasy Belarýs jáne Resei jaqtan keshigip jatqanyn aitty.Bul jabdyq olarǵa aldaǵy kóktemgi dala jumystaryn bastaý úshin qajet.
«Egis jumystary bir jarym aidan soń bastalady. Logistika marshrýty boiynsha alańdaýshylyq bar. Eger RF jáne Belarýs óz shekaralaryn japsa, sáikesinshe búkil taýar aǵyny Túrkiia jáne Ázerbaijan arqyly tasymaldanady. Baký jáne Aqtaý porttary mundai júktemege daiyn ba? Bul tehnikanyń turyp qalýy, kólik keptelisine ákep soǵady. Sonymen qatar jetkizý merzimin de keshiktiremiz. Bizge qazir tranzit úshin Resei jáne Balerýs shekarasynyń jabylmaǵany kerek», – dedi kompaniia ókili.
«QR Jihaz jáne aǵash óńdeý ónerkásibi kásiporyndarynyń qaýymdastyǵy» zańdy tulǵalar birlestiginiń prezidenti Qanat Ibraev otandyq jihaz ónerkásibiniń toqtap qalýyna kómektesetin birneshe usynysaitty.
«Birinshi kezekte, plitalyq materialdardy tasymaldaýdy sýbsidiialaý qajet. Biz buǵan deiin bul usynysty berdik, biraq ol Ekonomika ministrligi men Qarjy ministrliginde nazardan tys qaldy. Plitalyq material baǵasyndaǵy eń kóp úlesti, óndirýshi zaýytqa bailanysty, shamamen 40-50% tasymaldaý quraidy», – dep atap ótti Qanat Ibraev.
Budan ári, onyń pikirinshe, plitalyq material men fýrnitýrany jetkizýge arnalǵan salyq jeńildikterin ázirleý kerek. Sheteldik jabdyqty jetkizýge arnalǵan preferentsiialarǵa uqsas. Óitkeni ekeýi de Qazaqstanda óndirilmeidi. Sondai-aq aldaǵy 3 jylǵa korporativti tabys salyǵyna moratorii engizý qajet.
«Qazaq stone» Qazaqstan tas óńdeý salasynyń odaǵy» ZTB tóraǵasy Dáýren Aǵzymov odaq jyl boiy Máskeýmen otandyq tasty jetkizýge kelissózder júrgizgenin atap ótti. Alaida, jaqynda olar eldegi saiasi jaǵdaiǵa bailanysty barlyq jumys toqtaǵany týraly habarlama aldy.
«Biz osy jyly jumyssyz qaldyq. Ne isteý keregin bilmeimin...», - dedi ol.
Nur-Sultan qalasy kásipkerler palatasy direktorynyń mindetin atqarýshy Beisen Jolboldiev aitylǵan barlyq másele jinalyp, balamaly sheshimderdi izdeý úshin «Atameken» UKP jedel shtabyna jiberiletinin atap ótti.
Aita keteiik, Reseige salynǵan sanktsiialar saldarynan biznesi zardap shekken kásipkerler Nur-Sultan qalasy boiynsha jedel shtabqa habarlasa alady:
8 (7172) 91-90-80
+7 705 707 1482
+7 705 585 5579
+7 702 154 7707
WhatsApp nómir: 87788701432.
