Qazaqstan Qarýly kúshterinde baqylaý tekserýi bastaldy, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Áskerlerdi tekserý qysqy oqý kezeńi aiaqtalǵansha júrgiziledi.
Biyl Memleket basshysy Qasym-Jomart Toqaevtyń áskerdiń jaýyngerlik daiyndyǵyn túbegeili arttyrý jónindegi mindetterin iske asyrý sheńberinde bul shara jańa tártippen ótip jatyr.
«Bas shtabtyń josparyna sáikes, quramalar men áskeri bólimder dabyl boiynsha kóterildi. Bólimsheler praktikalyq oqý-jaýyngerlik mindetterdi oryndaityn poligondarǵa temir jol kóligimen, jaýyngerlik tehnikamen jetýdi júzege asyrady.
Poligondarda taktikalyq, onyń ishinde túngi jaǵdaida da oqý-jattyǵýlar men atystar ótetin bolady. Budan ózge, bólimderdiń belgilengen merzimde júktelgen tapsyrmalardy oryndaý úilesimdiligi men qabileti, áskeri qyzmetshilerdiń oqytylýy, sondai-aq komandirlerdiń baǵynysty jáne senip tapsyrylǵan bólimshelerdi basqara bilýi baǵalanatyn bolady.
Qarýly kúshterdiń barlyq quramalary men bólimderi, sondai-aq áskeri basqarý organdary tekseriledi», - delingen habarlamada.
