Qazaqstannyń shet elderdegi Elshilikteriniń qandastardan azamattyq alýǵa qujattar qabyldaýy kózdelgen ilki jobany iske asyrý máselesi pysyqtalyp jatyr. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Etnikalyq qazaqtar úshin qolaily jaǵdai jasaý aiasynda «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» 2020 jylǵy 13 mamyrdaǵy Zańmen etnikalyq qazaqtarǵa Qazaqstanda turaqty turýǵa ruqsat alýǵa jáne azamattyqty jeńildetilgen tártipte qabyldaýǵa bir mezgilde qujattar tapsyrýǵa múmkindik beretin jańa norma engizilgen. Bul qujatty qaraý merzimin 6 aidan 3 aiǵa deiin qysqartýǵa múmkindik beredi», - dedi Úkimet basshysy.
Onyń atap ótýinshe, qazirgi ýaqytta múddeli memlekettik organdar (EHÁQM, SIM, UQK, IIM, AQDM) memlekettik qyzmetterdi «bir tereze» qaǵidaty boiynsha kórsetý jónindegi Jol kartasyn iske asyrýda. Ondaǵy is-sharalar Qazaqstan azamattyǵyn alý rásimderin ońtailandyrýǵa, tiisti qujattar sanyn (46-dan 20-ǵa deiin) jáne olardy resimdeý merzimderin 2 ese qysqartýǵa baǵyttalǵan. Atalǵan «kompozittik» qyzmetterdi kórsetý boiynsha pilottyq joba osy jylǵy sáýir aiynda iske qosylady.
«Jol kartasy aiasynda Syrtqy ister ministrliginiń shet memleketterdegi mekemeleri arqyly «qandas» mártebesin alý, turaqty turýǵa ruqsat alý jáne Qazaqstan azamattyǵyn qabyldaýǵa qujattardy qabyldaý jónindegi pilottyq jobany iske asyrý máselesi de pysyqtalýda», - dedi Asqar Mamin.
