Qazaqstan elektr energetikasy salasyndaǵy ziiandy shyǵaryndylardy 60-70 paiyzǵa tómendetedi. Bul týraly III Kómir ónerkásibi forýmynda Ekologiia ministrligi klimattyq saiasat jáne jasyl tehnologiialar departamentiniń direktory Oljas Aǵabekov aitty, dep habarlaidy QazAqparat.
«Jalpy, elimizdiń kómirge táýeldiligi joǵary ekenin eskersek, energiia aýystyrý - biz úshin úlken syn-tegeýrin bolmaq. Degenmen, álemdik trendterdi, álemniń úlken jańalyqtar ashylýy aldynda turǵanyn kórip otyrmyz. Damý bolashaǵyn da baiqaimyz. Biraq, ekologiia, aýa raiy máselelerine bailanysty ózgeris bolady. Sondyqtan jańa stansalardyń qurylysyn qarastyrǵan kezde onyń qandai otynmen jumys isteitinin durys tańdaý óte mańyzdy», - dedi Turar Jolmaǵambetov.
Osy rette departament direktory Ekologiia ministrliginiń Ulttyq ekonomika ministrligimen birlesip, kómirtegi beitaraptyǵy strategiiasyn pysyqtap jatqanyn atap ótti.
«Orta eseppen alǵanda elimizde shamamen 2,5 mln tonna ziiandy zattar shyǵarylady. Onyń 900 myń tonnasy elektr jáne jylý energetikasy salalaryna tiesili. Osylaisha, atmosfera aýasyna teris áserdiń shamamen 30-40 paiyzy - elektr energetikasy salasynyń úlesinde. Bizdiń baǵalaýymyzsha, osynaý 900 myń tonna ziiandy shyǵaryndyny 60-70 paiyzǵa tómendetýge bolady. Bul - aldymyzǵa qoiyp otyrǵan biik maqsat», - dedi komitet tóraǵasynyń orynbasary.
