Qazaqstan densaýlyq saqtaý salasynyń deńgeii boiynsha álemdegi 93 eldiń ishinde 53-shi orynda tur, dep habarlaidy "Ult aqparat" Ranking.kz aqparat kózine silteme jasap.
Densaýlyq saqtaý salasynyń deńgeii boiynsha álemdik reitingti iri málimetter bazasy sanalatyn Numbeo jariialady.
Atalmysh reitingte Qazaqstan 93 memlekettiń ishinde 53-shi oryn alǵan. Bizdiń el sonymen qatar TMD elderiniń ishinde densaýlyq saqtaý júiesiniń sapasy boiynsha eń joǵary indekske ie.
Bul tizimde Belarýs (59-shy oryn), Resei (63-shi oryn), Ýkraina (78-shi oryn) jáne Ázerbaijan (91-shi oryn) Qazaqstannan qalyp keledi.
Reiting densaýlyq saqtaý júiesiniń jumys sapasyn, meditsinalyq jabdyqtarmen, qurylǵylarmen qamtamasyz etý deńgeiin, meditsinalyq qyzmetkerler men densaýlyq saqtaý salasyyndaǵy mamandardyń kásibiligin, emhanalardaǵy emdelý qunyn jáne taǵy basqa kórsetkishterdi baǵalaidy.
Bul turǵyda úzdik bes eldiń qatarynan Taivan, Ońtústik Koreia, Frantsiia, Japoniia jáne Daniia kórindi.
2020 jyldyń qańtar-shilde ailarynda Qazaqstanda densaýlyq saqtaý salasynda jalpy somasy 749,2 mlrd teńgeniń qyzmeti kórsetilgen. Bul – bir jyl burynǵy kórsetkishke qaraǵanda 19,2% kóp.
Sonymen qatar bul qyzmetterdiń 80,4% - biýdjet esebinen, 11,8% - halyq esebinen, 7,8% - kásiporyndar esebinen kórsetilgen.
Aimaqtardy bólip qaraǵanda densaýlyq saqtaý salasynda kórsetilgen qyzmetterdiń kóbi Almatyǵy tiesili: 128,5 mlrd teńge – bir jyl burynǵy kórsetkishten 22,6%-ǵa artyq. Ekinshi jáne úshinshi oryn Nur-Sultan (104,2 mlrd tg, +10,1%) jáne Qaraǵandy oblysy (53,1 mlrd teńge, +24%) tur.
Kórsetkishi eń úlken eki qala men bir oblysqa elde kórsetilgen jalpy meditsinalyq qyzmetterdiń úshten biri tiesili.
Qyzmet sektorynyń jartysynan kóbi aýrýhanada kórsetilgen. Atap aitqanda aýrýhanalardyń hirýrgiialyq bólimshesinde - 80,1 mlrd teńge, ginekologiialyq bólimshe men perzenthanalarda - 37,3 mlrd teńge, psihiatrlyq aýrýhanalarda - 16,8 mlrd teńgeniń qyzmeti kórsetilgen.
