BUU-nyń tereń tarihy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Bul týraly Qazaqstan Prezidenti Qasym-Jomart Toqaev Birikken Ulttar Uiymy Bas Assambleiasynyń mereitoilyq sessiiasy aiasynda BUU 75 jyldyǵyna arnalǵan Joǵary deńgeidegi kezdesýdegi beineúndeýinde málim etti, dep habarlaidy "Ult aqparat".
«Adamzat jylnamasyndaǵy eń joiqyn Dúniejúzilik soǵystan keiin 1945 jyldyń maýsym aiynda múldem jańa Uiymnyń qurylýy – barshamyz úshin aitýly ári tarihi oqiǵa. Dag Hammarsheldtiń Birikken Ulttar Uiymy «bizdi jumaqqa jetkizý úshin emes, tozaqtan qutqarý úshin qurylǵan» degen qanatty sózi barshaǵa aian. Bastapqyda BUU ujymdyq qaýipsizdikti qamtamasyz etý júiesi retinde qurylǵanymen, is júzinde álem elderin ortaq maqsat pen múddege biriktirdi. Sonyń arqasynda belsendi ári aýqymdy halyqaralyq yntymaqtastyq dáýiri ornyqty», - dep atap ótti Qazaqstan Prezidenti.
Osy oraida Memleket basshysy bul jol jeńil bolmaǵanyn eske saldy.
«Ókinishke qarai, ótken 75 jyl ishinde álemdi qaiǵy-qasiretten aryltýǵa baǵyttalǵan ortaq maqsattarymyz ben qundylyqtarymyzdy ilgeriletý jolynda kóptegen múmkindikti qoldan jiberip aldyq. Degenmen, sátsizdikten de, jetistikten de sabaq alǵan jón. BUU-nyń tereń tarihy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Atap aitqanda, otarsyzdanýdan ósip-órkendeýge, balalardy qorǵaýdan klimattyń ózgerýine, densaýlyq saqtaý isinen adam quqyǵyna, beibitshilikti qoldaýdan bitimgershilikke deiingi taqyryptar qamtyldy. Sońǵy otyz jylda Qazaqstan BUU-nyń barlyq basty organdarynda, sonyń ishinde, Qaýipsizdik keńesinde janjaldardy retteý, iadrolyq qarýdy taratpaý jáne qarýsyzdaný, terrorizmge qarsy kúres, konfessiiaaralyq jáne ultaralyq dialog, teńizge shyǵa almaityn damýshy elderdiń múddesin qorǵaý siiaqty basymdyqtardy dáripteýge atsalysty», - dedi Qasym-Jomart Toqaev.
«Al, endi búgingi zamannyń sipatyna zer salsaq, kóptegen jańa syn-qaterler, sondai-aq qaita etek alǵan keibir táýekelder bizdi ótken kezeńge oraltýy múmkin ekenin baiqaimyz. Qazirgi tańda mýltilateralizm zor qaterge tap boldy. Mundai ahýal qyrǵi-qabaq soǵys aiaqtalǵannan beri týyndamaǵan edi», - dedi QR Prezidenti.
