2018 jyldyń qańtarynan Qazaqstan Birikken Ulttar Uiymynyń Qaýipsizdik Keńesine tóraǵalyq etetin bolady. Bul týraly búgin Aqordada Qazaqstandaǵy Tótenshe jáne Ókiletti Elshi bolyp taǵaiyndalǵan birqatar sheteldiń diplomatynan senim gramotasyn qabyldaǵan Elbasy Nursultan Nazarbaev aitty, dep habarlaidy "Ult aqparat".
«2018 jyldyń qańtar aiynda bizdiń el BUU Qaýipsizdik Keńesine birinshe ret tóraǵalyq etetin bolady. Osy halyqaralyq organ aiasynda biz barlyq áriptestermen tabysty jumys isteýge niettimiz», - dep atap ótti Memleket basshysy.
Sonymen qatar Elbasy Qazaqstannyń búgingi ekonomikasy iskerlik yntymaqtastyqqa keń múmkinshilik, zor áleýet ashyp otyrǵanyn basa aitty.
«Biz sheteldik áriptestermen saýda-ekonomikalyq qarym-qatynasymyzdy nyǵaitýǵa múddelimiz. Qazaqstanda Eýraziialyq ekonomikalyq odaqqa, Ortalyq Aziia men Qytai naryǵyna shyǵatyn infraqurylym qalyptasty. Ekonomikalyq yntymaqtastyq pen damý uiymynyń, Eýropalyq odaq pen Aziianyń kóptegen elderi úshin vizasyz rejim engizildi», - dedi Qazaqstan Prezidenti.
Nursultan Nazarbaev investorlar men biznesmenderdiń ózara tiimdi is-qimyl ornatý maqsatynda elimizde Qazaqinvest, Qazaqeksport ulttyq kompaniialary qurylǵanyn eske saldy.
«EKSPO-nyń murasy retinde birneshe iri nysandar jumysyn bastaityn bolady. Olar: Astana halyqaralyq qarjy ortalyǵy, Jasyl tehnologiialardy damytý jónindegi BUU-nyń halyqaralyq ortalyǵy jáne IT-startaptardyń halyqaralyq tehnoparki. Sizderdiń elderińiz osy jobalardy iske asyrýǵa belsendi qatysady dep senemin», - dedi Elbasy sheteldik diplomattarǵa qarata.
.jpeg)