Atyraýda kóktemgi balyq aýlaý maýsymynda 6,5 myń tonnaǵa jýyq balyq aýlandy, dep habarlaidy "Ult aqparat".
Óńirlik kommýnikatsiialar qyzmetiniń habarlaýynsha, 6 492 tonna balyq aýlanyp, belgilengen limit 87 %-ǵa igerilgen.
Atyraý oblystyq balyq sharýashylyǵy basqarmasynyń aqparatyna súiensek, biyl kóktemgi balyq aýlaý maýsymyna Jaiyq-Kaspii basseini boiynsha 7434 tonna kvota bólingen. Onyń ishinde Kaspii teńizinen – 3 190 tonna, Jaiyq ózeninen – 2 223 tonna, Qiǵash ózeninen – 2 021 tonna balyq aýlanýy josparlanǵan. Ótken jylmen salystyrǵanda, kásibi túrde balyq aýlaý kólemi 794 tonnaǵa ósken. Al, byltyr 5 698 tonna bolatyn.
«Biyl aýlanǵan balyqtyń 5000 tonnasy óńdelip, 4069 tonnasy Resei Federatsiiasy, Ýkraina, Ázerbaijan jáne Izrail elderine eksporttaldy. Qazir Atyraý oblysynyń aýmaǵynda túrli menshik nysanyndaǵy 18 óndiristik kásiporyn balyq aýlaý jáne qaita óńdeýmen ainalysady. Onyń arasynda eki bekire balyǵyn ósirý zaýyty bar. Olar – «Jaiyq-Atyraý» bekire balyq ósirý zaýyty» RMQK, «Atyraý bekire balyq ósirý zaýyty» RMQK» -dedi oblystyq balyq sharýashylyǵy basqarmasynyń basshysy Artýr Sádibekuly.
Sondai-aq, biyl memlekettik tapsyrysty oryndaý maqsatynda bekire balyǵyn ósirý zaýyttary úshin 269 dana balyq aýlandy. Ótken jyly bekire tuqymdas 241 balyq aýlanǵan edi. Atalǵan eki zaýyt jyl saiyn Kaspii teńizine jasandy jolmen ósirilgen 7 mln-nan astam bekire shabaqtaryn jiberedi.
