Búgin kúres túrlerinen Qazaqstan birinshiliginde erkin kúresten úsh salmaqtyń jeńimpazdary anyqtaldy, dep habarlaidy "Ult aqparat".
Aqmola oblysynan kelgen Dáýlet Temirjanov 57 kelide qarsylas shaq keltirgen joq. Dáýlet finalda qaraǵandylyq Javohir Iristaevty 12:2 esebimen tize búktirdi. Jambyldyq Rahat Qaljan men shymkenttik Ǵabit Tólepbai qola júlde ielendi.
Aita keterligi, atalǵan salmaqta belgili balýan Nurislam Sanai 1/8 finaldan árige asa alǵan joq. Ol osy salmaqta aldaǵy Olimpiada joldamasyna ie bolǵan edi.
Al 61 kelide Almaty oblysynyń balýany Adlan Asqarov jeńimpaz tuǵyryna kóterildi. Adlan aqtyq synda atyraýlyq Salamat Málikovten myqtylyǵyn tanytty. Úzdik úshtikti Shyǵys Qazaqstan oblysynyń sportshysy Rasýl Qaliev pen qaraǵandylyq Azat Oganissian túiindedi.
Alǵashqy jarys kúnin 86 kelidegi balýandar qorytyndylady. Bul salmaqta Shyǵys Qazaqstan oblysynan kelgen Azamat Dáýletbekov altyn aldy. Ekinshi oryn Almaty oblysynyń sportshysy Esqali Dáýletqazyǵa buiyrsa, mańǵystaýlyq Nurdáýlet Kókteýbaev pen almatylyq Ádilet Dáýlembaev úzdik úshtikten kórindi.
Esterińizge sala ketelik, búgin Almaty qalasyndaǵy «Dostyq» sport kesheninde kúres túrlerinen Qazaqstan birinshiligi jalaýyn kóterdi. Jarys 26 qarashaǵa deiin jalǵasady. Endi erkin kúres sheberleri 21-22 qarasha kúnderi qalǵan salmaqtarda synǵa túsedi. Al áielder kúresinen 23 qarashada 10 qarashada júldeler sarapqa salynsa, grek-rim kúresiniń sheberleri 24-26 qarasha aralyǵynda toǵyz salmaqta júldege talasady.
