Qazaqstan benzin eksporttaýshy elge ainaldy. Syrtqy naryqqa benzin jetkizý ótken jylǵa qaraǵanda naqty mánde 58 ese, qunyna shaqqanda 49 ese ósti, dep habarlaidy "Ult aqparat" energyprom.kz saityna silteme jasap.
2020 jyldyń qańtar-tamyzynda Qazaqstannyń munai óńdeý zaýyttary aviaotyndy qosa alǵanda 2,9 mln tonna benzin shyǵardy. Bul ótken jylǵy kórsetkishten 3,3 paiyzǵa kóp. 2019 jyldyń ishinde elimizde 4,5 mln tonna motor otyny óndirilgen bolatyn. Kórsetkish 2018 jylmen salystyrǵanda 14,7 paiyzǵa joǵary.
Óńirlik shekte óndirilgen ónimiń eń úlken kólemi «PetroQazaqstan Oil Prodakts» JShS jumys isteitin Shymkent qalasyna tiesili. Óńirde óndirilgen ónim jalpy respýblikada shyǵarylǵan janar-jaǵarmaidyń 44,9 paiyzyn quraidy. Shymkent zaýytynda 1,3 mln tonna benzin óndirilip otyr. Bul bir jyl burynǵy kórsetkishten 8,7 paiyzǵa kóp.
Al ekinshi orynda turǵan Pavlodar oblysynda 858,7 myń tonna benzin óndirilgenimen, óndiris kólemi jyl ishinde 1,9 paiyzǵa kemigen.
Atyraý oblysyndaǵy munai óńdeý zaýyty da jyl ishinde óndiris kólemin 1,1 paiyzǵa tómendetip aldy. Óńirde 688,7 myń tonna janar-jaǵarmai shyǵaryldy.
7 aidyń qorytyndysynda otandyq kompaniialar benzin suranysyn (ishki naryq pen eksportty qosa alǵanda) tolyqtai qamtamasyz etti. Import úlesi kóp emes, nebári 0,03 paiyz ǵana. Bir jyl ishinde otyn importy 25 ese tómendedi. Al eksport úlesi 11,1 paiyzdy qurady. Kompaniialar ótken jylmen salystyrǵanda onyń kólemin 44 esege arttyryp, 276,7 myń tonnaǵa jetkizdi.
Al 2020 jyldyń qańtar-tamyzynda kompaniialar 362,1 myń tonna avtomobil benzinin eksportqa shyǵaryp, ósim kólemin 57,6 esege jetkizdi. Aqshaǵa shaqqanda eksport 125,6 mln dollar boldy. Bul ótken jylǵy túsimnen 48,5 ese kóp. TMD elderine 36,7 mln dollar somaǵa 103,3 myń tonna benzin jóneltildi. Qazaqstan benzininiń negizgi importtaýshy elderi - Qyrǵyzstan, Tájikstan jáne Ózbekstan. Álemniń qalǵan elderine 88,9 mln dollarǵa 258,8 myń tonna avtomobil benzini jiberildi. Negizgi importtaýshylar: Aýǵanstan, Niderlandy jáne Grýziia.
2020 jyldyń qyrkúieginde elimizdiń ishki naryǵynda benzin baǵasy shamaly jyldyq ósim kórsetti. AI-92 benzini bir jyl ishinde 2,8 paiyzǵa qymbattap, litri 150,8 teńgeni, AI-95/95 1,2 paiyz ósimmen 171,4 teńgeni, AI-98 1,5 paiyz ósimmen 190,2 teńgeni qurady.
