Foto: QR OAM
Búgin Ortalyq kommýnikatsiialar qyzmetiniń alańynda Qazaqstan Respýblikasy Oqý-aǵartý ministrliginiń ókilderi «Qazaqstan balalary» atty 2026–2030 jyldarǵa arnalǵan tujyrymdamany tanystyrdy, dep habarlaidy Ult.kz.
Tujyrymdamanyń ázirlenýi
Atalǵan qujat Memleket basshysynyń tapsyrmasymen Bala quqyqtary jónindegi ýákilmen jáne tiisti memlekettik organdarmen birlesip ázirlengen. Alǵash ret balalardyń qaýipsizdigin qamtamasyz etýge, bilim alýǵa, densaýlyǵyn qorǵaýǵa, sondai-aq otbasyn qoldaý men áleýmettik qorǵaýǵa baǵyttalǵan barlyq qoldanystaǵy sharalar men baǵdarlamalar bir júieli qujatqa biriktirildi.
Balalar sany jáne demografiialyq jaǵdai
Brifing barysynda Qazaqstanda shamamen 6,9 mln bala turatyny aityldy. Bul el halqynyń jalpy sanynyń 34 paiyzyna teń. Sońǵy 10 jylda balalar sany 1,5 mln-ǵa artqan, bul turaqty demografiialyq ósimdi jáne balalyq shaq salasyndaǵy memlekettik saiasattyń ózektiligin kórsetedi.
Tórt basym baǵyt
Tujyrymdama bala quqyqtarynyń negizgi baǵyttaryn qamtityn tórt basym baǵyttan turady:
balalardyń qaýipsizdigi;
sapaly bilim alý quqyǵy;
densaýlyqty qorǵaý;
otbasy jáne áleýmettik qorǵaý salasyndaǵy quqyqtar.
Qujattyń tiimdiligin baǵalaý úshin 10 indikator belgilenip, ony iske asyrý 158 is-shara arqyly qamtamasyz etiledi.
Balalardyń qaýipsizdigi
Qujatta balalardyń qaýipsizdigine erekshe nazar aýdarylǵan. Qazirgi tańda elde psihologiialyq qoldaý ortalyqtary jumys isteidi, barlyq mektepterde qaýipsizdik sabaqtary engizilgen, sondai-aq «111» bailanys ortalyǵy qyzmet kórsetýde.
Tujyrymdama aiasynda zorlyq-zombylyqtan zardap shekken balalarǵa kómek kórsetý infraqurylymyn damytý, táýekelderdi erte anyqtaýǵa arnalǵan tsifrlyq quraldardy engizý jáne psihologiialyq ári mentorlyq súiemeldeýdi keńeitý josparlanyp otyr.
Tsifrlandyrý
Tujyrymdamanyń jeke bólimi tsifrlandyrýǵa arnalǵan. 2027 jyldan bastap mGov platformasynda memlekettik qoldaý sharalaryn biryńǵai esepke alatyn jáne otbasylardyń qaita júginýinsiz balany vedomstvoaralyq súiemeldeýdi qamtamasyz etetin «Balanyń joly» tsifrlyq júiesi engiziledi.
Bilim jáne áleýmettik saiasat
Bilim berý salasynda mektepke deiingi jáne inkliýzivti bilim berýdi damytý, infraqurylymdy jańǵyrtý, bilim berý uiymdarynyń sapasy men jaýapkershiligin arttyrý jumystary jalǵasady.
Áleýmettik salada balalar úilerindegi tárbieleý modelinen otbasylyq ornalastyrý nysandaryna kóshý, tálimgerlikti damytý jáne ataýly qoldaýdy kúsheitýge basymdyq beriledi.
Kútiletin nátije
«Qazaqstan balalary» tujyrymdamasyn iske asyrý balalardyń quqyqtary men ál-aýqatyn qorǵaýdyń tutas ári ornyqty júiesin qalyptastyrýǵa, áleýmettik jáne bilim berý qyzmetterine teń qoljetimdilikti qamtamasyz etýge, árbir balanyń damýyna qaýipsiz orta qurýǵa jáne uzaq merzimdi áleýmettik táýekelderdi azaitýǵa múmkindik beredi.
Eske sala keteiik, 2025 jylǵy 27 qańtarda Qazaqstan Respýblikasy Úkimetiniń otyrysynda «Qazaqstan balalary» 2026–2030 jyldarǵa arnalǵan tujyrymdamasy resmi túrde bekitilgen.
