Búgin Qazaqstannyń shet memleketterdegi qurmetti konsýldarynyń sezi barysynda birqatar diplomattar marapattaldy. Olardyń ishinde Qazaqstannyń Siriiadaǵy qurmetti konsýly Said Naxas myrzaǵa erekshe alǵys aityldy, dep xabarlaidy QazAqparat tilshisi.
«Biz Said Naxas myrzaǵa erekshe alǵysymyzdy aitaiyn dep edik. Sebebi ol kisi Siriiadaǵy qarýly qaqtyǵystar aimaǵynan Qazaqstan azamattaryn shyǵarýǵa úlken kómek kórsetti. Shyny kerek, ol jumys ońaiǵa soqpady. Qazaqstandyqtardy elge qaitarý sharasy kádimgidei áskeri operatsiiaǵa ainaldy. Óitkeni sol kezde qarýly qaqtyǵystar qatty júrip jatqan. Qurmetti konsýlymyz qolda baryn jasap, qarýly kúzetke deiin taýyp berdi. Olar arnaiy marshrýt boiynsha Siriianyń qaýipti aimaqtarymen júrdi. Jol-jónekei qarýly oppozitsiianyń birneshe toptary arqyly ótýge týra keldi. Sóitip, Beirýt pen Livan arqyly Qazaqstanǵa aman-esen jetti. Sol úshin Said Naxas myrzaǵa shyn alǵysymyzdy aitamyz», - deidi QR Syrtqy ister ministrligi Konsýldyq qyzmet departamentiniń basshysy Ardaq Mádiev.
Aita keteiik, búgingi shara barysynda Chexiia, Horvatiia, Italiia, Germaniia, Ýkraina, Moldova, Japoniia, Soltústik Afrika men Pákistandaǵy Qazaqstannyń qurmetti konsýldary marapattaldy. Barlyǵyna «QR Diplomatiialyq qyzmetine 25 jyl» mereitoilyq medali tabystaldy. Búginde Qazaqstannyń shet elderdegi konsýldary investitsiialardy tartyp, san alýan máselelerdi sheshýmen ainalysady.
