Ýkrainadaǵy jaǵdai ýshyqqan kezde Kiev pen Odessa qalalarynda bolǵan Qazaqstan azamattary Polsha shekarasyna qalai jetkenin aitty, dep habarlaidy QazAqparat.
«Meniń atym – Rýslan. Petropavl qalasynyń turǵynymyn. Qazir Polshadaǵy Katovitse áýejaiynyń mańaiyndamyz. Bul jerge keshe keshke jettik. 21 aqpanda jyl saiyn Kievte ótetin konferentsiiaǵa ushyp kelgenbiz. Kievte soǵys jaǵdaiy jariialanyp, konferentsiia jumysyn toqtatty. Áýelde ne isteý keregin bilmedik. Ahýal turaqtanǵansha Kievte qala turý kerek dep oilaǵanbyz. Keiin Lvov arqyly keri qaitýǵa árekettendik. Óitkeni Kievtegi Qazaqstan Elshiligi Lvov arqyly batys shekaramen Polsha jaǵyna ótýge bolatyny týraly málimet taratqan edi», - dep eske alady videodaǵy azamat.
Polsha Eýropalyq Odaqtyń múshesi bolǵandyqtan, el aýmaǵyna kirý úshin tólqujatta Shengen vizasy bolýy mindetti edi.
Bul máseleni Qazaqstannyń Polshadaǵy Elshiligi jyldam rettegenge uqsaidy.
«Polsha Qazaqstan azamattaryna «jasyl dáliz» usyndy. Qazaqstannan Kievtegi konferentsiiaǵa kelgen 15 adam top-toppen Kiev qalasynan shyǵa bastady. Bizdiń toptaǵy 5 adam ortalyq temirjol vokzalynan shyqtyq. Bilet joq eken, jolseriktermen kelisýge týra keldi. Kelesi kúnniń tańynda Lvov qalasyna jettik. Qazaqstannyń Ýkraina men Polshadaǵy elshilik qyzmetkerlerine ýaqytynda jedel aqparat berip, jón siltep otyrǵany úshin alǵys aitqymyz keledi. Lvovta bizdi kútip alyp, shekaradan Polsha aýmaǵyna alyp ótý jumysyn uiymdastyrdy. Polshada bizge «jasyl dáliz» berildi. Óitkeni bizdiń tólqujatymyzda Shengen vizasy joq edi. Osy jumystyń bári jyldam, jedel, naqty isteldi. Bizdi Polshada QR Konsýly kútip alyp, kóligimen jol bastap otyryp, áýejaidyń janyndaǵy qonaqúige ákeldi», - deidi Rýslan.
Polshanyń Katovitse qalasyna búgin ushyp shyqqan ushaqty kútip otyrǵandardyń biri – Smaiyl Abibýlla.
«Sońǵy jarty jylda Ýkrainanyń Odessa qalasynda jumys babymen turyp jatqanmyn. Osy Ýkrainadaǵy sońǵy oqiǵalarǵa bailanysty elden shyǵýǵa májbúr boldyq. Oqiǵalar bastalǵan kezde otbasymyzben alańdap, Ýkrainadan shyǵýdyń joldaryn izdedik. Elshiliktegi shuǵyl jeliler arqyly Lvov qalasyna kelý kerektigin bildik. Sol jerde jinap, Polsha arqyly Qazaqstanǵa qaitarmaqshy eken. Amalyn taýyp, Lvov qalasyna aman jettik. Ol qaladan bizge avtobýs uiymdastyryldy. Sol avtobýspen Polsha shekarasyna jettik. Polsha shekarasynan ótý de ońai bolǵan joq. Shekaraǵa 10 shaqyrymdai qalǵanda keptelis bastaldy. Biraq elshiliktiń arqasynda politsiia qyzmetkerleri kómek berip, qarsy jolaqpen shekaraǵa kedergisiz jetip aldyq. Shekarada ǵana sál aialdadyq. Shekaradan ótken soń bizdi Polshadaǵy elshiliktiń qyzmetkerleri, sol jerdegi Qurmetti konsýldyń ózi qarsy aldy. Polshaǵa kirýimizdi de, viza máselesin de sheship berdi. Eshqandai qiyndyq týyndaǵan joq», - deidi ol.
Qazaqstan azamaty Ýkraina men Polshadaǵy elshilik qyzmetkerlerine alǵys aityp otyr.
«Ári qarai bizdi Katovitse qalasyndaǵy otelge ornalastyrdy. Jaǵdaiymyzdy jasap jatyr. Polshadaǵy Elshilik bolsyn, Ýkrainadaǵy Elshilik bolsyn, qoldan kelgenin istep jatyr. Qyzmetkerlerine alǵysymyz sheksiz. Qiyn kezeńde Qazaqstan azamattaryna tún uiqysyn tórt bólip qyzmet etip jatqan siiaqty. Qazir elden keletin ushaqty kútip otyrmyz. Ushaqpen birge Ýkrainadan Qazaqstan azamattaryn ákeletin taǵy 2-3 avtobýsty kútip otyrmyz. Solar kelgen boida, buiyrtsa, bárimiz elge ushamyz», - deidi Smaiyl Abibýlla.
