Qazaqstan Aýǵanstanǵa tehnikalyq jáne gýmanitarlyq kómek kórsetýin jalǵastyrady. Bul týraly búgin Aqordada Qazaqstandaǵy Tótenshe jáne Ókiletti Elshi bolyp taǵaiyndalǵan birqatar sheteldiń diplomatynan senim gramotasyn qabyldaǵan Elbasy Nursultan Nazarbaev aitty, dep habarlaidy QazAqparat.
«Osy jyldary Aýǵanstanmen ózara saiasi is-qimyl aitarlyqtai jandanyp keledi. 2015 jyly Aýǵanstan Prezidenti Mohammad Ashraf Ǵani resmi saparmen Qazaqstanǵa keldi. Biyl biz Ǵani myrzamen Shanhai yntymaqtastyq uiymy men Islam yntymaqtastyq uiymynda kelissózder júrgizdik. Ózara saýda kólemi jarty mlrd dollarǵa jetip, Almaty men Kabýl qalasynda saýda úileri ashyldy. Biz tehnikalyq jáne gýmanitarlyq kómek kórsetýdi de jalǵastyra beretin bolamyz. Aýǵanstannyń qaýipsiz ári ornyqty damýy óńirimizdegi beibitshilik, turaqtylyqty órkendetýdiń kepili bolady», - dedi Nursultan Nazarbaev.
Memleket basshysy Qazaqstan Kanadamen kóp salaly yntymaqtastyqty odan ary nyǵaitýǵa nietti ekendigin basa aitty.
«Ótken jyly G-20 sammitindegi kezdeýde Premer-Ministr Djastin Triýdomen túrli saladaǵy bailanystardy nyǵaitý jóninde ýaǵdalastyq. Biylǵy maýsym aiynda Astanada Qazaqstan-Kanada iskerlik keńesiniń ótýi sol ýaǵdalastyqtyń naqty iske asyrylýy bolyp tabylady. Belgiiamen is-qimyl ózara qurmet pen senim qaǵidattaryna negizdelgen. 2014 jylǵy qazanda men Briýsselge jumys saparymen baryp, joǵary mártebeli Korol Filippen kelissózder ótkizdim. Onda ekijaqty jáne kópjaqty yntymaqtastyqtyń ózekti máseleleri jóninde pikir alystyq. Belgiia kapitaly, tehnologiialaryn Qazaqstan naryǵyndaǵy birlesken jobalarǵa belsendi túrde tartýdy quptaimyz», - dedi Elbasy.
Nursultan Nazarbaev Polsha Respýblikasy Ortalyq jáne Shyǵys Eýropadaǵy Qazaqstannyń negizgi seriktesteriniń biri bolyp tabylatyndyǵyn airyqsha atady.
«2016 jylǵy tamyzdaǵy Varshavaǵa meniń memlekettik saparymnyń jáne Polsha Prezidenti Andjei Dýdanyń biylǵy qyrkúiektiń basyndaǵy Qazaqstanǵa memlekettik saparynyń qorytyndylaryn joǵary baǵalaimyz. Ótken kelissózder Qazaqstan-Polsha arasyndaǵy dialogtyń áleýeti zor ekendigin dáleldep, ózara tiimdi kóptegen jobalarǵa jol ashty dep sanaimyn», - dedi QR Prezidenti.
Elbasy Qazaqstan men Finliandiiany dástúrli dostyq qatynastar men kóp jyldardan bergi yntymaqtastyq bailanystyryp kele jatqandyǵyna da toqtaldy.
«Prezident Saýli Niinisteniń biylǵy maýsymdaǵy Astanaǵa sapary ózara is-qimylymyzdyń joǵary deńgeide ekendigin kórsetti. Astana men Helsinki arasynda tikelei áýe reisiniń ashylýy aitýly oqiǵa boldy. Jasyl tehnologiialardy damytý jónindegi ortalyq quryldy. Qazaqstanda finn kásiporyndary ashylýda. Joǵarǵy jáne úkimetaralyq deńgeidegi ýaǵdalastyqtardyń odan ary iske asyrylýyn qamtamasyz etýge daiynbyz. Solardyń nátijesinde mashina jasaý, ǵarysh, metallýrgiia, kólik jáne basqa da salalarda tehnologiialyq jobalar ázirlendi», - dedi Memleket basshysy.
QR Prezidenti Frantsiia Prezidenti Emmanýel Makronmen jemisti bailanysty damytýǵa nietti ekendigin, eki eldiń arasynda ekonomikalyq, mádeni, bilim salasyndaǵy qarym-qatynastar burynnan damyp kele jatqanyn aitty.
«Estoniiamen qarym-qatynasymyz qarqyndy damyp kele jatqanyn atap ótkim keledi. Biz kólik jáne tranzit, energetika, kommýnikatsiia, tehnologiia siiaqty perspektivaly baǵyttar boiynsha jumys jasaýǵa ázirmiz. Eýropalyq odaqqa tóraǵalyq etip otyrǵan Estoniia basshylyǵy Qazaqstan men Eýropa seriktestigin ilgeriletýge úles qosady dep senemiz», - dedi Nursultan Nazarbaev.
