Taiaý jyldary Qazaqstan arqyly internet-sálemdeme tranzitin 6 esege ulǵaitýǵa bolady. Bul týraly búgin halyqpen eseptik kezdesý ótkizip jatqan Ulttyq ekonomika ministri Rýslan Dálenov aitty, dep habarlaidy QazAqparat tilshisi.
«Taiaý 5 jyldyń ishinde elektrondy saýda ainalymy 1 trln dollarǵa artatyndyǵy kútilip otyr. Biz Eýropa men Qytai arasynda, tutynýshy men sálemdemelerdi jóneltýshilerdiń arasynda óte tiimdi ornalasqanbyz. Sondyqtan kólik legin Qazaqstan arqyly jóneltýdiń keleshegi úlken. Bul úshin barlyq infraqurylym bar. Mundai sálemdemelerdi rásimdeý úshin barlyq kedendik túzetýler engizilgen. Biz taiaý jyldary Qazaqstan arqyly internet-sálemdeme tranzitin 6 esege ulǵaitýǵa bolady dep esepteimiz», - dedi ministr.
Onyń atap ótýinshe, onlain-saýdany yntalandyrý úshin Internette elektrondy ádis arqyly saýda jasaityndarǵa tabys salyǵy men korporativtik tabys salyǵy birneshe jylǵa alynyp tastalǵan. Eksportqa arnalǵan taýarlardy deklaratsiialaý da jeńildetilgen.
«Endigi ýaqytta Internet arqyly satyp alynatyn poshta qujattary nemese sálemdemeler kóterme rásimdelýi múmkin. Endi poshta qujattary deklaratsiia retinde tanylady. Elektrondy saýda óte qarqyndy damyp keledi jáne barynsha tiimdi sektor sanalady», - dedi Rýslan Dálenov.
Ministrliktiń dereginshe, elimizde tutynýshylardyń quqyǵyn qorǵaý institýty kúsheitilip jatyr. Elektrondyq saýdadaǵy satyp alýshy kádimgi saýdadaǵydai qorǵalǵan. Elektrondyq saýda sharttary jaqsartylýda. Ótken jyly onyń bólshek saýdadaǵy úlesi 1,9-dan 2,9 paiyzǵa nemese 92 mlrd teńgege ulǵaidy.
