QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda kóktemgi egis jumystaryn ótkizý barysy qaraldy.
Aýyl sharýashylyǵy ministri Saparhan Omarov, energetika ministri Nurlan Noǵaev, Túrkistan oblysynyń ákimi Ómirzaq Shókeev, Qostanai oblysynyń ákimi Arhimed Muhambetov jáne Soltústik Qazaqstan oblysynyń ákimi Qumar Aqsaqalov baiandama jasady, dep habarlaidy primeminister.kz saity.
2020 jyly aýyl sharýashylyǵy daqyldaryn 22,5 mln ga alańǵa egý josparlanǵan. Bul rette dándi jáne dándi-burshaqty daqyldar alańy 15,2 mln ga, onyń ishinde bidai alańy 11,4 mln ga quraidy. Maily daqyldardyń boljamdy alańy 3 mln ga, kókónis-baqsha daqyldary men kartop alańy 471,7 myń ga, azyqtyq daqyldar alańy 3,7 mln ga, tehnikalyq daqyldar 132,5 myń ga quraidy.
Aýyl sharýashylyǵy daqyldary respýblikanyń barlyq óńirlerinde egilip jatyr. Qazirgi ýaqytta dándi jáne dándi-burshaqty daqyldar 9,6 mln ga nemese jospardyń – 65%, maily daqyldar – 2,3 mln ga (76%), kókónis-baqsha daqyldary men kartop – 400 myń ga (85%), qant qyzylshasy – 20,5 myń ga (93%), maqta – 118 myń ga (100%), kópjyldyq shópter – 352 myń ga (100%) egildi. Ońtústiktegi oblystarda, sondai-aq Aqtóbe jáne Atyraý oblystarynda egis jumystary aiaqtalýǵa taiap qaldy. Biyl jaqsy ónim alý úshin qolaily aýa raiy bolady dep boljanýda.
«Birikken Ulttar Uiymynyń janyndaǵy Azyq-túlik jáne aýyl sharýashylyǵy uiymy – FAO boljamy boiynsha Qazaqstan agroónerkásiptik keshen salasyndaǵy áleýeti joǵary AQSh, Avstraliia, Braziliia jáne Argentina memleketteriniń qatarynda jáne álemdik azyq-túlik habyna ainalýyna naqty múmkindigi bar», — dedi A. Mamin.
Premer-Ministr aýyl sharýashylyǵy óndirisiniń qarqynyn ulǵaitý aiasynda sapaly ári qoljetimdi shikizat bazasyn ósirý, ónimdilikti joǵarylatý, joǵary bólinis ónimderiniń óndirisine jedel kóshý boiynsha sharalardy qabyldaýdy tapsyrdy.
Úkimet basshysy alǵa qoiǵan mindetterdiń oryndalýyna Túrkistan oblysyn mysal retinde keltirdi, onda 4 jyl ishinde aýyl sharýashylyǵy óndirisin 3 esege arttyrý boiynsha keshendi jospar bar.
Memlekettik qoldaý aiasynda zamanaýi sýarý tehnologiialaryn paidalana otyryp, iri jáne orta aýyl sharýashylyǵy qurylymdarynyń sýarmaly ýchaskelerin keńeitýge, egin kólemin ulǵaitýǵa erekshe nazar aýdarylady. Bul daiyn ónim óndiretin kelesi óndiristerdi damytýǵa mýltiplikativti áser beredi.
Premer-Ministr Aýyl sharýashylyǵy ministrligine ákimdiktermen birge ár óńir boiynsha aýyl sharýashylyǵy salasynyń ereksheligin eskerip, agroónerkásip keshenin damytýdyń keshendi baǵdarlamasynyń jańa tujyrymdamasyn ázirleýdi tapsyrdy.
