Qazaqstan 4 aida óńdelgen taýarlar eksportyn 7,3 mlrd AQSh dollaryna jetkizdi. Bul týraly Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
«Osy jylǵy qańtar-sáýirde syrtqy saýda taýar ainalymy 40,8 paiyzǵa ósip, 39,7 mlrd AQSh dollaryn qurady. Onyń ishinde eksport boiynsha kórsetkish shamamen 60 paiyzǵa artyp, 26,5 mlrd AQSh dollaryna deiin jetti. Bul rette óńdelgen taýarlar eksporty 32 paiyzǵa ulǵaiyp, 7,3 mlrd AQSh dollaryna deiin jetip otyr. Taýar importy 13,2 mlrd dollardy qurady. Jalpy, oń saýda balansy jaqsaryp, 13,2 mlrd AQSh dollaryna deiin ósti», - dep atap ótti ministr.
Onyń dereginshe, óńdeý ónerkásibinde joǵary ósý qarqyny saqtalyp otyr. Osy jyldyń qańtar-mamyr ailarynda óndiris kólemi 5,3 paiyzǵa ósti.
16 óńir boiynsha oń ósim kórsetkishi tirkeldi. Eń joǵarǵy ósim Almaty qalasynda, sondai-aq Qostanai, Atyraý jáne Shyǵys Qazaqstan oblystarynda baiqaldy.
«Óńdeý ónerkásibi salalary boiynsha mashina jasaý óndirisiniń 9,9 paiyzǵa, onyń ishinde avtomobil jasaýdyń – 22,8, kompiýter, elektrondy jáne optika quraldar jasaýdyń – 17,3, qurylys materialdary – 5,2, sýsyndar – 18,3, plastmassa buiymdary – 11,4, daiyn metall buiymdary – 10,2, farmatsevtika ónimderi – 4,7, kiim óndirisiniń 9,9 paiyzǵa ósýi qamtamasyz etildi. Taý-ken ónerkásibinde óndiris kólemi 4,3 paiyzǵa ulǵaidy», - dedi Álibek Qýantyrov.
Ministrdiń atap ótýinshe, salalar bólinisinde ósim taý-ken ónerkásibinde qyzmet kórsetýde – 18,9, gaz óndirýde – 6,3, shiki munai óndirýde – 4,7, kómir óndirýde – 2,2, metall kenderin óndirýde – 1,9, ózge de paidaly qazbalardy óndirýde 0,2 paiyzdy qurady.
