قازاقستان 4 ايدا ٶڭدەلگەن تاۋارلار ەكسپورتىن 7,3 ملرد اقش دوللارىنا جەتكٸزدٸ. بۇل تۋرالى ٷكٸمەت وتىرىسىندا قر ۇلتتىق ەكونوميكا مينيسترٸ ەلٸبەك قۋانتىروۆ ايتتى, دەپ حابارلايدى قازاقپارات.
«وسى جىلعى قاڭتار-سەۋٸردە سىرتقى ساۋدا تاۋار اينالىمى 40,8 پايىزعا ٶسٸپ, 39,7 ملرد اقش دوللارىن قۇرادى. ونىڭ ٸشٸندە ەكسپورت بويىنشا كٶرسەتكٸش شامامەن 60 پايىزعا ارتىپ, 26,5 ملرد اقش دوللارىنا دەيٸن جەتتٸ. بۇل رەتتە ٶڭدەلگەن تاۋارلار ەكسپورتى 32 پايىزعا ۇلعايىپ, 7,3 ملرد اقش دوللارىنا دەيٸن جەتٸپ وتىر. تاۋار يمپورتى 13,2 ملرد دوللاردى قۇرادى. جالپى, وڭ ساۋدا بالانسى جاقسارىپ, 13,2 ملرد اقش دوللارىنا دەيٸن ٶستٸ», - دەپ اتاپ ٶتتٸ مينيستر.
ونىڭ دەرەگٸنشە, ٶڭدەۋ ٶنەركەسٸبٸندە جوعارى ٶسۋ قارقىنى ساقتالىپ وتىر. وسى جىلدىڭ قاڭتار-مامىر ايلارىندا ٶندٸرٸس كٶلەمٸ 5,3 پايىزعا ٶستٸ.
16 ٶڭٸر بويىنشا وڭ ٶسٸم كٶرسەتكٸشٸ تٸركەلدٸ. ەڭ جوعارعى ٶسٸم الماتى قالاسىندا, سونداي-اق قوستاناي, اتىراۋ جەنە شىعىس قازاقستان وبلىستارىندا بايقالدى.
«ٶڭدەۋ ٶنەركەسٸبٸ سالالارى بويىنشا ماشينا جاساۋ ٶندٸرٸسٸنٸڭ 9,9 پايىزعا, ونىڭ ٸشٸندە اۆتوموبيل جاساۋدىڭ – 22,8, كومپيۋتەر, ەلەكتروندى جەنە وپتيكا قۇرالدار جاساۋدىڭ – 17,3, قۇرىلىس ماتەريالدارى – 5,2, سۋسىندار – 18,3, پلاستماسسا بۇيىمدارى – 11,4, دايىن مەتالل بۇيىمدارى – 10,2, فارماتسەۆتيكا ٶنٸمدەرٸ – 4,7, كيٸم ٶندٸرٸسٸنٸڭ 9,9 پايىزعا ٶسۋٸ قامتاماسىز ەتٸلدٸ. تاۋ-كەن ٶنەركەسٸبٸندە ٶندٸرٸس كٶلەمٸ 4,3 پايىزعا ۇلعايدى», - دەدٸ ەلٸبەك قۋانتىروۆ.
مينيستردٸڭ اتاپ ٶتۋٸنشە, سالالار بٶلٸنٸسٸندە ٶسٸم تاۋ-كەن ٶنەركەسٸبٸندە قىزمەت كٶرسەتۋدە – 18,9, گاز ٶندٸرۋدە – 6,3, شيكٸ مۇناي ٶندٸرۋدە – 4,7, كٶمٸر ٶندٸرۋدە – 2,2, مەتالل كەندەرٸن ٶندٸرۋدە – 1,9, ٶزگە دە پايدالى قازبالاردى ٶندٸرۋدە 0,2 پايىزدى قۇرادى.
