Senattyń jalpy otyrysynda «Qazaqstan men Aziia damý banki arasyndaǵy Qaryz týraly kelisimdi ratifikatsiialaý týraly» Zańy jáne «Qazaqstan men Aziia infraqurylymdyq investitsiialar banki arasyndaǵy Qaryz týraly kelisimdi ratifikatsiialaý týraly» Zańy qabyldandy, dep habarlaidy "Ult aqparat".
«Sizderdiń qaraýyńyzǵa eki zań jobasy usynylyp otyr. Bul kelisimderge Qazaqstan Respýblikasy Prezidentiniń 2020 jylǵy 13 tamyzdaǵy №385 jáne №386 Jarlyqtaryna sáikes qol qoiyldy», - dedi QR Qarjy ministri Erulan Jamaýbaev.
Qazaqstan Respýblikasy men Aziia damý banki arasyndaǵy 908 mln 596 myń eýro somasyndaǵy jáne Aziia infraqurylymdyq investitsiialar banki arasyndaǵy 661 mln 800 myń eýro somasyndaǵy Qaryz týraly kelisimderge qol qoiyldy. Qaryzdar 2021 jylǵa arnalǵan biýdjet tapshylyǵyn qarjylandyrýǵa baǵyttalatyn bolady. Iaǵni COVID-19 pandemiiasynyń saldarymen kúres jáne ekonomikany qalpyna keltirý boiynsha Qazaqstan Respýblikasy Úkimetiniń sharalaryn qoldaýǵa múmkindik beredi.
«Aziia damý bankiniń qaryzy óteý merzimine qatysty eki bólikke bólingen. 454 mln 298 myń eýro somasyndaǵy qaryzdyń bir bóligi, iaǵni jartysy 3 jyldyq jeńildik kezeńdi qosa alǵanda, 10 jyl merzimge beriledi. Al qalǵan 454 mln. 298 myń eýro somasyndaǵy ekinshi jartysy 3 jyldyq jeńildik kezeńdi qosa alǵanda, 5 jyl merzimge beriledi. Syiaqy mólsherlemesi ‒ Eýribor+0,50%», - dep naqtylady ministr.
Budan bólek, Aziia infraqurylymdyq investitsiialar bankiniń qaryzy 3 jyldyq jeńildikti kezeńdi qosa alǵanda, 10 jyl óteý merzimine beriledi. Syiaqy mólsherlemesi ‒ Eýribor+0,50%.
«Kelisimderde belgilengen qarjylyq sharttarǵa sáikes qaryzdarǵa qyzmet kórsetýdi jáne ony óteýdi respýblikalyq biýdjet qarajaty esebinen júzege asyratyn bolady. Bul qarajat Aziia damý bankiniń jáne Aziia infraqurylymdyq investitsiialar bankiniń pandemiiaǵa qarsy kúres jónindegi arnaiy baǵdarlamalary aiasynda Qazaqstan Respýblikasy úshin rezervtelgen», - dedi E. Jamaýbaev.
