QR Mádeniet jáne sport ministrligi Qazaqkontsert memlekettik uiymy 60-shy mereitoilyq kontserttik maýsymyn támamdady, dep habarlaidy "Ult aqparat".
Tutas maýsymdy qorytyndylaǵan gala-kontsertte Aiman Musahodjaeva, Azamat Jyltyrkózov, Medet Shotabaev, Erlan Rysqali, Saltanat Ahmetova, Álfiia Kárimova, Aizada Qaponova syndy tanymal solister óner kórsetti. Sondai-aq ónersúier qaýym Qazaq memlekettik simfoniialyq orkestriniń oryndaýynda úzdik shedevrlerdi tyńdai aldy. Onda Ýkrainadaǵy Dnepropetorvsk filormoniiasynyń kórkemdik jetekshisi Aidar Torybaev dirijerlik etti.
Kontserttik baǵdarlamaǵa «Qyz Jibek», «Eńlik-Kebek», «Karmen», «Sevilskii tsiriýlnik», «Irodiada» jáne basqa da operalardyń ariialary engen. Sonymen birge kontsertte E. Hasanǵaliev, S. Erkimbekov, Dj. Rossini, I.Gaidn jáne V.A.Motsart, L. Bernstain, L.Hamidi syndy belgili kompozitorlarynyń týyndylary shyrqaldy.
«Bul maýsymda jurtshylyqqa usynǵan jańalyq az bolǵan joq.Alpystyń asýyn baǵyndyryp, igi dástúr men jańashyldyqty qatar ushtastyra bilgen Qazaqkontserttiń barlyq jobalary biyl da halyqty rýhani sýsyndatyp, barshaǵa qoljetimdi boldy. Mereitoilyq jyl aiasynda ártisterimiz kórermenderdi onlain jáne oflain formattaǵy is-sharalarmen qýantty. Atap aitqanda, 50-ge jýyq oflain jáne 100-ge tarta onlain formatta jańa jobalardy usyndy. Onyń ishinde qaiyrymdylyq sharalar, ashyq aspan astyndaǵy qoiylymdar men kontsertter bar. Biyl Qazaqkontserttiń shyǵarmashylyq áleýeti jańa baǵytta dami túsip, uiymnyń áleýmettik mańyzy da arta tústi. Endi dál osy qarqynmen jańa kontserttik maýsymǵa daiyndyq júrgizemiz», - deidi kontserttik uiymnyń basshysy Jeńis Seidýllauly.
Aita keteiik, kontsertte koronavirýs pandemiiasyna bailanysty barlyq sanitarlyq talaptar men erejeler saqtaldy.
