Málimdemege Qazaqstannyń halyq ártisi Dosqan Joljaqsynov jaýap berdi.
"Qymbatty Tigran Keosaian, sen ózińniń qoiylymyńdy ainadan kórdiń be? Menińshe, qarap shyǵýyń kerek. Menińshe, sen ol jerde aramza Mýssolinidi beinelep, ózińe kóp alyp tursyń. Birinshiden, sen Resei emessiń, ekinshiden, kúshti bolsań, joǵary bilik eshelonyna ait. Al meniń halqyma tiispe. Men halqymnyń tarihyn, adamzattyń kópǵasyrlyq mádeni jáne rýhani ómiri men halqymnyń eýraziialyq keńistiktegi abyroiyn baiandap otyrǵym kelmeidi.
Sen Kopeliar emessiń, sen Djigarhanian emessiń. Sen shovinissiń. Sen ultaralyq jekkórýshilikti qozdyrýshysyń. Seni Donetsk, Lýganskide urys alańynda kórer edim. Meniń oiymsha, uly Reseige sen siiaqty jaǵympazdar qajet emes. Taǵy osyndai komedi klab jasamas buryn Simonianmen keńes, ol aqyldy áiel", - dedi akter.
Dosqan Joljaqsynov Tigran Keosaianǵa "qinalyp yryldama, kindigiń ashylyp ketedi" dedi.
Osy videony Jelige júktegen akterdiń jary Qarakóz Súleimenova Keosaiannyń "Qazaqstanymyz jaily namysqa tietin, obektiv emes málimdemesine qarap otyra almaǵanyn" jazdy.
"Álemde bolyp jatqan jaǵdaidyń saldaryn kórip otyrmyz. Biraq ultaralyq qaqtyǵysqa tamyzyq tastap otyrǵan jýrnalistiń áreketi kúlli qazaqty qorlap otyr! Beibit otyrǵan eldiń tynyshtyǵyn urandaýmen eshkim buza almaidy. Jaǵympazdyq pen ekijúzdilik, máńgúrttiktiń túbi Otansyzdyqtan týady. Bul sonyń kórinisi", - dedi ol.
Qazaqsha blog júrgizetin mýzykant, dombyrashy Aleksei Lodochnikov ta qarap qalmady. Ol Instagram-daǵy paraqshasynda Keosaianǵa mýzykalyq sálemdeme joldady.
"Videony kórdik, osylar qyrtady da júredi. Nazar aýdarmai-aq qoiaiyq. (...). "Gde vasha blagodarnost" dep qoiady. Kimge, saǵan ba? Ne úshin? Úiimniń aýlasyn sypyrdyń ba sen meniń? Sen Qazaqstanǵa, qazaqtarǵa tiispe, ońbaisyń. Sen qazaqtardy bilmeisiń", - dedi ol.
Qoǵam jáne mádeniet qairatkeri Malik Hasenov te Tigran Keosaiandy jaǵympaz dep óleń shýmaqtaryn aitty.
"Men sizdiń ákeńizdiń filmderin kórip óstim. Ol ońbaǵan adamdy tárbielep shyqqan genii. Kókte uialyp jatqany sózsiz. Uly rejisser ómirden ótti. Biraq búldirgish qaldy. Biz ol nege esalań bolyp ketkenin bilemiz, stsenariidi Margarita Simonian jazady", - dedi ol.
Malik Hasenov ol bizge qaharmen sóilep tursa da, "Siz" deitinin, sebebi Qazaqstanda ony solai tárbielegenin aitady.
"Bizdi qorqytqylaryńyz keldi me? Biraq, ókinishke qarai, shabýyldaityn adam biz emes. Maestro Gasparian ósiet etkendei, jaman halyq bolmaidy, tek jaman adamdar bar. Men oǵan elge kirýge tyiym salý kerek dep usynbaimyn. Sebebi qorqaq it onsyz da kelmeidi. Ýaqyty kelgende ol sazaiyn ózi-aq tartady", - dedi ol.
Aita keteiik, Margarita Simonian - Tigran Keosaiannyń jary. Ol - RT telearnasy, "Rossiia segodnia" halyqaralyq aqparat agenttigi jáne Sputnik aqparat agenttiginiń bas redaktory.
Buǵan deiin Qazaqstan Syrtqy ister ministrligi de reseilik jýrnalist Tigran Keosaiannyń Qazaqstan týraly málimdemesine qatysty pikir bildirgen bolatyn.
Kollaj: Tengrinews.kz
