Qazaqfilm kinostýdiiasy Gollivýd filmderiniń ornyna sáýir aiynan bastap kinoteatrlar prokatyna qandai filmder usynatyny belgili boldy, dep habarlaidy QazAqparat.
Sh.Aimanov atyndaǵy «Qazaqfilm» AQ 14 sáýirden bastap Darejan Ómirbaevtiń «Aqyn» atty jańa filmin shekteýli prokatqa shyǵarady. Buǵan deiin atalmysh kartina Tokioda ótken bedeldi halyqaralyq kinofestivalde «Úzdik rejisser» nominatsiiasy boiynsha júldeger atanǵan bolatyn.
Qazirgi ýaqytta kinostýdiiada «Bizdiń súiikti dáriger 2» filmi túsirilip jatyr. Aita keteiik, bul týyndynyń ataýy «Bizge dáriger kerek» bolyp ózgertildi.
Jaqyn ýaqytta qazaqstandyq kórermender úshin Aqan Sataevtyń «Uly dala tańy» blokbasteriniń premerasy ótedi. Joba buryn «Qasym han» degen atpen tanymal bolǵan.
«Bul bizdiń elimizdiń tarihyndaǵy basty tulǵalardyń biri – Qasym han týraly aýqymdy hikaia.
Aty ańyzǵa ainalǵan bileýshi XV-XVI ǵasyrlar aralyǵynda qazaq halqynyń bostandyǵy men táýelsizdigi úshin kúresken simvoldyń birine ainaldy. Dál osy ýaqyt aralyǵy kóbine Qasym hannyń arqasynda bizdiń memlekettiligimiz ben uly qazaq dalasynyń gúldený kezeńi sanalady. Kópten kútken joba 12 mamyrda jaryqqa shyǵady», - dedi «Qazaqfilm» AQ ókili Kárim Qadyrbaev.
Sonymen qatar kinostýdiiada aldaǵy ýaqytta bolatyn ulttyq kino ortalyǵynyń pitchingine daiyndyq júrip jatyr. Osy jobaǵa qatysý úshin Qazaqfilm kreativti ideiasy bar jas, talantty avtorlardy birlese eńbek etýge shaqyrady.
«Qazaqfilm» elimizdiń jalǵyz memlekettik kinostýdiiasy retinde kinematografister men kórermenderdiń keiingi býyny aldyndaǵy jaýapkershiligin sezine otyryp, birlesken jobalardy júzege asyrýda jas rejisserler men stsenaristerge tolyq kómek kórsetýge daiyn», - dedi spiker.
