قازاقفيلم كينوستۋديياسى گولليۆۋد فيلمدەرٸنٸڭ ورنىنا سەۋٸر ايىنان باستاپ كينوتەاترلار پروكاتىنا قانداي فيلمدەر ۇسىناتىنى بەلگٸلٸ بولدى, دەپ حابارلايدى قازاقپارات.
ش.ايمانوۆ اتىنداعى «قازاقفيلم» اق 14 سەۋٸردەن باستاپ دارەجان ٶمٸرباەۆتٸڭ «اقىن» اتتى جاڭا فيلمٸن شەكتەۋلٸ پروكاتقا شىعارادى. بۇعان دەيٸن اتالمىش كارتينا توكيودا ٶتكەن بەدەلدٸ حالىقارالىق كينوفەستيۆالدە «ٷزدٸك رەجيسسەر» نوميناتسيياسى بويىنشا جٷلدەگەر اتانعان بولاتىن.
قازٸرگٸ ۋاقىتتا كينوستۋدييادا «بٸزدٸڭ سٷيٸكتٸ دەرٸگەر 2» فيلمٸ تٷسٸرٸلٸپ جاتىر. ايتا كەتەيٸك, بۇل تۋىندىنىڭ اتاۋى «بٸزگە دەرٸگەر كەرەك» بولىپ ٶزگەرتٸلدٸ.
جاقىن ۋاقىتتا قازاقستاندىق كٶرەرمەندەر ٷشٸن اقان ساتاەۆتىڭ «ۇلى دالا تاڭى» بلوكباستەرٸنٸڭ پرەمەراسى ٶتەدٸ. جوبا بۇرىن «قاسىم حان» دەگەن اتپەن تانىمال بولعان.
«بۇل بٸزدٸڭ ەلٸمٸزدٸڭ تاريحىنداعى باستى تۇلعالاردىڭ بٸرٸ – قاسىم حان تۋرالى اۋقىمدى حيكايا.
اتى اڭىزعا اينالعان بيلەۋشٸ XV-XVI عاسىرلار ارالىعىندا قازاق حالقىنىڭ بوستاندىعى مەن تەۋەلسٸزدٸگٸ ٷشٸن كٷرەسكەن سيمۆولدىڭ بٸرٸنە اينالدى. دەل وسى ۋاقىت ارالىعى كٶبٸنە قاسىم حاننىڭ ارقاسىندا بٸزدٸڭ مەملەكەتتٸلٸگٸمٸز بەن ۇلى قازاق دالاسىنىڭ گٷلدەنۋ كەزەڭٸ سانالادى. كٶپتەن كٷتكەن جوبا 12 مامىردا جارىققا شىعادى», - دەدٸ «قازاقفيلم» اق ٶكٸلٸ كەرٸم قادىرباەۆ.
سونىمەن قاتار كينوستۋدييادا الداعى ۋاقىتتا بولاتىن ۇلتتىق كينو ورتالىعىنىڭ پيتچينگٸنە دايىندىق جٷرٸپ جاتىر. وسى جوباعا قاتىسۋ ٷشٸن قازاقفيلم كرەاتيۆتٸ يدەياسى بار جاس, تالانتتى اۆتورلاردى بٸرلەسە ەڭبەك ەتۋگە شاقىرادى.
«قازاقفيلم» ەلٸمٸزدٸڭ جالعىز مەملەكەتتٸك كينوستۋديياسى رەتٸندە كينەماتوگرافيستەر مەن كٶرەرمەندەردٸڭ كەيٸنگٸ بۋىنى الدىنداعى جاۋاپكەرشٸلٸگٸن سەزٸنە وتىرىپ, بٸرلەسكەن جوبالاردى جٷزەگە اسىرۋدا جاس رەجيسسەرلەر مەن ستسەناريستەرگە تولىق كٶمەك كٶرسەتۋگە دايىن», - دەدٸ سپيكەر.
