Aqmola oblysynda «Qazaqaltyn» taý-ken metallýrgiia kombinaty» AQ-nan katodty altyn urlaǵan kúdiktiler qolǵa tústi, dep habarlaidy "Ult aqparat".
Aqmola oblysynyń Politsiia departamenti baspasóz qyzmetiniń málimetinshe, urlyq 2 naýryzǵa qaraǵan túni bolǵan. Budan kásiporynǵa 122 million teńge zalal kelgen.
«Osyǵan bailanysty Qylmystyq kodekstiń 188-baby 4-bóligi «urlyq» boiynsha sotqa deiingi tergeý sharalary qolǵa alyndy. Osy qylmysqa qatysy bar adamdardy anyqtaý úshin kriminaldyq politsiia men tergeýdiń tájiribeli qyzmetkerleri qatarynan arnaiy jedel-tergeý toby quryldy», - dedi vedomstvodan.
PD baspasóz qyzmetiniń málimetinshe, jedel-izdestirý jáne tergeý is-sharasy barysynda 300-ge jýyq adamnan jaýap alyndy, kásiporyn obektilerinde, sondai-aq kenttiń perimetri boiynsha ornalasqan beinebaqylaý kameralarynan beinejazbalar zerdelendi jáne taldandy.
«Nátijesinde Jolymbet kentiniń 26 jáne 34 jastaǵy turǵyny, iaǵni «Qazaqaltyn» taý-ken metallýrgiia kombinaty» AQ-nyń eki qyzmetkeri anyqtaldy. Kúdiktiler ózderiniń qylmystyq nietin qylmys jasaýdan alty ai buryn josparlaǵany beligili boldy. Kúdiktiler qylmystaryn moiyndady. Zattai dáiekterdi kúdiktilerdiń biri týysynyń páterine jasyrǵany anyqtalyp, tárkilendi», - dep tolyqtyrdy vedomstvodan.
