Qazaq televiziiasynyń ardageri Nurtileý Imanǵaliuly ómirden ótti. Qaiǵyly habardy Qazaqstan ulttyq telearnasynyń baspasóz qyzmeti taratty, – dep habarlaidy «Ult aqparat».
«Búgin tańerteń qazaq televiziiasynda 45 jyl qyzmet atqarǵan jýrnalistika ardageri Nurtileý Imanǵaliuly ómirden ótti. Nurtileý Imanǵaliuly «Qurdastar», «Jastar daýysy», «Arai», «Jadyńda ma, joldas», «Aina», «Jas jiger»,«Betpe-bet», «Qoltańba», «Dińgek», «Kórshiler», «Zań sóilesin», «Nur-Tiley» avtorlyq baǵdarlamalary arqyly qalyń kórermen esinde qaldy» delingen habarlamada.
Nurtileý Imanǵaliuly 1952 jyly 1 mamyrda Almaty oblysy Aqsý aýdanynda dúniege kelgen. Qazaq televiziiasynda tilshi, redaktor, aǵa redaktor, kommentator, bas redaktor, saiasi sholýshy, direktordyń orynbasary, «Habar» agenttiginde moderator-júrgizýshi, odan keiin Úkimet keńsesinde sektor meńgerýshisi, Prezident Ákimshiliginde bas maman bolyp istegen.
Aita keteiik, Nurtileý Imanǵaliuly 2006-2007 jyldary – «Qazaqstan» respýblikalyq teleradiokorporatsiiasy» aktsionerlik qoǵamynyń basqarma tóraǵasy, odan keiingi jyldary «Qazaqstan RTRK» AQ basqarma tóraǵasynyń keńesshisi qyzmetterin atqardy. Sońynda izbasar shákirtter tárbieledi. Búgin Ulttyq arna efirinen estelik habarlar men arnaiy jobalar beriledi.
