«Qazaqkontsert» memlekettik kontserttik uiymy «Qazaq radiosynyń» 100 jyldyq mereitoiyna orai merekelik kontsert arnady. «Qazaqstan» OKZ kameralyq zalynda ótken kontsert eki úlken uiymnyń yntymaqtastyq qarym-qatynasyn nyǵaita tústi, dep habarlaidy "Ult aqparat".
«Qazaqkontsert» pen «Qazaq radiosy» uiymdaryn kóptegen mádeni-tanymdyq jobalar bailanystyrady. Sondai-aq ǵasyr qurdasy atanǵan radionyń altyn qorynda Qazaqkontsertte eńbek etken óner sańlaqtarynyń týyndylary saqtalǵan. Biyl «Qazaqkontsert» uiymy da óziniń 60 jyldyǵyn atap ótetinin eskersek, bul qos mereitoiǵa arnalǵan kontsert ult rýhaniiatyn arttyra túskeni anyq.
Merekelik is-shara barysynda quttyqtaý sózin «Qazaqkontsert» memlekettik kontserttik uiymynyń direktory Jeńis Seidýllauly jetkizdi:
«Aqparattyq, tarihi-tanymdyq, mədeni-aǵartýshylyq baǵyttaǵy ózekti týyndylar toǵysqan osyndai irgeli uiymmen Qazaqkontserttiń yntymaqtastyq ornatýy bizdi erekshe qýantady. Qazaq mýzyka óneriniń qarashańyraǵy atanǵan Qazaqkontserttiń tarihy «Qazaq radiosymen» tyǵyz bailanysty. Qazaqkontsertte eńbek etken óner sańlaqtarynyń týyndylary Qazaq radiosynyń tolqynynda estilgen saiyn bizdiń de tarihymyz jańǵyra, jańara túsedi. Ǵasyr qurdasy atanǵan «Qazaq radiosy» órkendei bersin. Shyǵarmashylyqtaryńyz tabysqa, eńbekterińiz úlken jetistikterge ulassyn! Halyq rýhaniiatyn damytatyn Qazaqkontsert pen Qazaq radiosynyń birlesken jobalary kóp bolsyn!» - dedi Jeńis Seidýllauly.
Uiymdastyrýshylardyń atap ótýinshe, kontsert barysynda barlyq sanitarlyq talaptar saqtaldy.
Merekelik kontsertte «Astana sazy» memlekettik folklorlyq ansambli, Erbolat Shaldybekov, Klara Tólenbaeva, Aigúl Elshibaeva, Qurmash Mahanov, Gúlnár Kóshenova syndy ártister óner kórsetti. Kontsert baǵdarlamasyna belgili halyq týyndylary men zamanaýi shyǵarmalar engen. «Qazaq radiosynyń» ujymy da ózderiniń alǵystaryn jetkizip, eki uiym arasyndaǵy seriktestik odan ári kúsheie túsetinine senim bildirdi.
