Qazaq meditsinalyq úzdiksiz bilim berý ýniversiteti bas litsenziiasynan aiyryldy, dep habarlaidy Bilim jáne ǵylym ministrliginiń baspasóz qyzmeti.
Ministrliktiń málimdeýinshe, sapasyz bilim beretin joǵary oqý oryndarynyń sanyn qysqartý boiynsha jumys jalǵasyp jatyr. Barlyq tekserý qatań túrde qoldanystaǵy zańnamaǵa sáikes júzege asyrylýda. Talaptar boiynsha joǵary oqý oryndary anyqtalǵan buzýshylyqtardy berilgen ýaqyt ishinde joiýy tiis.
«Máselen, ótken jyly QR BǴM Bilim jáne ǵylym salasyndaǵy sapany qamtamasyz etý komiteti Qazaq meditsinalyq úzdiksiz bilim berý ýniversitetiniń bilim berý qyzmetine tekserý júrgizip, nátijesinde óreskel buzýshylyqtar anyqtady. Atap aitsaq, joǵary oqý ornyndaǵy bakalavriat, magistratýra, doktorantýra, rezidentýra baǵdarlamasy boiynsha oqý úrdisi qajetti professorlyq-oqytýshylyq qurammen jáne tiisti materialdyq-tehnikalyq bazamen qamtamasyz etilmegen. Sonymen qatar oqý ornyndaǵy ózge de mańyzdy kórsetkishter belgilengen eń tómengi normalarǵa sáikes kelmeidi», delingen habarlamada.
Vedomstvo 2020 jylǵy shilde aiyndaǵy tekseris nátijesi boiynsha atalǵan ýniversitet litsenziiasynyń kúshin toqtatyp, anyqtalǵan kemshilikterdi joiýǵa ýaqyt bergen. Alaida, qaita tekseris júrgizý kezinde Qazaq meditsinalyq úzdiksiz bilim berý ýniversiteti Komitettiń nusqamalaryn oryndamaǵany jáne zańnamany óreskel buza otyryp, jumysyn jalǵastyrǵany belgili boldy.
«Bolashaq dárigerlerge sapaly bilim berý – adamdardyń ómiri men densaýlyǵynyń kepili. Osy oraida biz sotqa júginýge májbúr boldyq. Qazaq meditsinalyq úzdiksiz bilim berý ýniversitetin jabý máselesin sot ta, Bilim jáne ǵylym ministrliginiń komiteti te qarady. Almaty qalasynyń mamandandyrylǵan aýdanaralyq ákimshilik sotynyń qaýlysyna sáikes Qazaq meditsinalyq úzdiksiz bilim berý ýniversiteti ákimshilik jaýapkershilikke tartyldy. Odan bólek, JOO-ǵa aiyppul salynyp, bas litsenziiadan aiyrý týraly sheshim shyǵaryldy», – dedi QR BǴM Bilim jáne ǵylym salasynda sapany qamtamasyz etý komitetiniń tóraiymy Gúlzat Kóbenova.
Qazaq meditsinalyq úzdiksiz bilim berý ýniversiteti Almatydaǵy dárigerlerdiń biliktiligin jetildirý uiymynyń bazasynda 2015 jyly qurylǵan. Búgingi tańda atalǵan oqý ornynda 3 myńnan astam stýdent oqidy.
«Elimiz boiynsha 14 joǵary oqý orny bolashaq dárigerlerdi daiyndaidy, onyń beseýi Almaty qalasynda ornalasqan. QazMÚBBÝ-da oqyǵan stýdentterdiń granttary saqtalady jáne olar basqa joǵary oqý oryndaryna aýystyrylady. Oqý quny ózgermeidi. Sondai-aq oqytýshylardy jumysqa ornalastyrý máselesi jeke qarastyrylyp jatyr», – dep atap ótti Gúlzat Kóbenova.
Bas litsenziiadan aiyrý týraly sot sheshimi 10 jumys kúninen keiin zańdy kúshine enedi jáne joǵary oqý orny bilim berý qyzmetin toqtatýǵa mindetti bolady.
