Abaidyń keshegi ózi ómir súrgen zamanynda aitqan azamattyq oilary búgingi kúni de ózektiligin joiǵan joq. Mundai pikirdi QR Jazýshylar odaǵy Nur-Sultan qalalyq filialynyń direktory, aqyn Dáýletkerei Kápuly bildirdi, dep habarlaidy QazAqparat.
«Abai halyqtyń Abaiy bolǵannan keiin bul kún ulttyq merekege ainalyp jatyr. Abaidyń keshegi ózi ómir súrgen zamanynda halyqtyń muńyn muńdaǵan dúniesi, jalpy azamattyq oilary búgingi kúni de ózektiligin joiǵan joq. Sonyń ishinde qazaq qoǵamyna ne kerek, qazaq qoǵamyna qandai qadir-qasiet qajet degende áli kúnge Abaiǵa júginemiz. Ony Abaidan tabamyz. Sondyqtan Abai kúni tek bir ǵana kún emes jyl boiy atalyp ótilýi tiis. Qazaqtyń ómir súrý ǵurpynda, saltynda Abaidyń oilaý júiesi, Abaidyń qazaqty súiýi, ultqa degen mahabbaty jalǵasyn tabýy kerek. Óitkeni, Abaidy tek bir kún ǵana ultyqtap, qalǵan kúnderi umytý tanymymyzǵa jat dúnie. Abaimen maqtanǵan kúnniń ózinde de onyń shyǵarmalaryn tanyp baryp qana maqtanǵanymyz jón», - dedi Dáýletkerei Kápuly.
Aita keteiik, qazaqtyń uly aqyny Abaidyń 175 jyldyq mereitoiyna orai QR Memlekettik hatshysy Qyrymbek Kósherbaev bastaǵan bir top memleket jáne qoǵam qairatkeri elordadaǵy Abai eskertkishine saltanatty jaǵdaida gúl shoqtaryn qoiǵan edi.
Esterińizde bolsa taiaýda Qazaqstan Úkimetiniń qaýlysymen 10 tamyz Abai kúni bolyp belgilendi.
