QR PARLAMENTI jáne BARLYQ DEŃGEIDEGI OBLYSTYQ, AÝDANDYQ MÁSLIHATTAR DEPÝTATTARY men JERGILIKTI «QAZAQ TILI» qoǵamy, «TIL KOMITETTERI» NAZARYNA.
Búgin - QR Konstitýtsiiasy kúni. Depýtat myrzalar, ondaǵan jyldar boiy osy máselege shyndap barýǵa árekettenbeýimiz qalai? Orys tiliniń normalaryna sai «Qazaq» etnogenezi, odan shyqqan sózderdiń barlyǵy qazaq tiliniń transkriptsiiasyna sáikes oryssha da «Kazakstan, Kazakskii» t.b bolyp jazylyp, aitylatyndai qalypyna keltirý jóninde «Zań» qabyldaý ýaqyty kelgen másele.
Kórshi qyrǵyzdar «Kirgizdy» «Kyrgyz», «Kirgizstandy» «Kyrgyzstan» dep, Moldovandar «Moldaviiany» «Moldovo», belorýstar «Belarýssiiany» «Belorýs» etip túzetip aldy. Sóitip, olar HHI ǵasyr tabaldyryǵyn áldeqashan taza óz atymen attady. «Qazaq» ataýynyń orys tilinde de burmalanbai aitylýy Á.Bókeihanov, A.Baitursynuly, M.Tynyshpaev, M.Esenaliev, S.Aqatai siiaqty t.b Alash Uldarynyń, ziialylarymyzdyń da armany edi. Bul másele búgingi urpaǵynyń da arman, muratyna ainaldy.
Aitarymyz: memleket aty qazaq tilinde: «Qazaqstan Respýblikasy» oryssha: «Respýblika Kazakstan» bolyp, aldaǵy ýaqytta memlekettiń barlyq resmi rámizderinen kórinis tabýy kerek. «Kazah» sóziniń «Kazak», «Kazahstan» sóziniń «Kazakstan» bolyp durys jazylýyna esi aýysqan bireý bolmasa ózge túgili, orystildiler de qarsy bolmaidy.
Endeshe, kim kedergi? Bizdińshe bul máseleler eshqandai qarsylyq týdyrmaidy. Sońǵy kúnderi elde tildi nasihattaý baǵytynda qoǵamdyq sharalar ótkizý jiilei bastady. Endigi jerde irkiliske boi aldyra bermei til mamandary, ǵalym-filologtar, qoǵamdyq qozǵalystar men saiasi partiialar, oqý aǵartý isiniń qyzmetkerleri-muǵalimder, til janashyrlary aldaǵy ýaqytta osy baǵytta da qoǵamdyq pikir týdyrý jumystaryn bastaýy kerek. Muny Parlament depýtattary aldyna qoiatyn da ýaqyt kelgen sekildi.
Qurmetpen, Nurlybai Qoshamanuly,
Aqtóbe q. 29.08.2016.
Ult portaly
