Vremiankada turýǵa tyiym salýy múmkin deidi. Qai genii oilap tapty myna bastamany. Nobelge suranyp-aq tur eken. "Áleýmettik máseleni sheshýdiń marqasqasy" degen ataq berse de bolady.
Ainalaiyndar! Qazaq erikkennen vremiankada turyp jatyr ma? Óz erkimen peshi de, ashanasy men jatyn bólmesi de birge salynǵan aiadai ǵana lashyqta otyr ma? Ómirdiń jaqsylyǵynan sol vremiankada iis tiip qyrylyp jatyr ma? Joq! Barlyǵy da joqshylyqtyń, tapshylyqtyń, kedeishiliktiń kesiri.
Astanadaǵy bes qyzdyń órtenip ólýine vremianka kináli emes, áleýmettik jaǵdaidyń nasharlyǵy sebepker. Aqshasy bar bolsa, qaǵanaǵy qaq, saǵanaǵy saq bolsa, bes perishtesin bes bólmeli úige otyrǵyzar edi ǵoi baiǵus ata-ana. Bes qyzynyń burymyn órip, ómirden lázzat alyp otyrar edi...
Máseleni sheshýde únemi syrttai kúldirip, ishtei kúiindiretin sheshim qabyldaý qashan toqtaidy. Al jaqsy. Vremiankaǵa turýǵa tyiym salyńdar, sonda basqa qaida turady?! Kóbiniń jaǵdaiy páter jaldap turýǵa jetpeidi. Vremiankada turatyn qazaqtyń kóbisi aiyna 50 myń tabys tabady. Ákesi men sheshesi qosarlasa tapqan 100 myńdy páterge berse, tamaqty qai qarajatqa satyp alady? Jazda topyraq, qysta qar jeidi ma álde?! Kiimdi qai aqshaǵa kiedi? Japyraq jabystyryp júre ma?! Aýyrsa dárini nege alady? Álde óle bersin be?!
Qazaqtyń vremiankada turǵanyn qalamaisyzdar ma? Bárekeldi. Mende qalamaimyn. Onda ár qazaq páter alýǵa múmkindigi týatyn áleýmettik reforma jasańdar. Ár qazaqtyń resýrsty naqty ári shynaiy bólgende kottedjde turýǵa jaǵdaiy keler edi. Biraq ókinishke orai "Altyn balyq" ertegisindei az qazaq saraida, kóp qazaq lashyqta turyp jatyr.
Máseleni shynaiy sheshýdi bastaiyq. Vremiankada turýǵa tyiym salý sheshim emes. Odan iis tiip qyrylatyn qazaq azaimaidy. Kerisinshe bilikke narazy buqara sany artady. Odanda naqty áleýmettik baǵdarlamalar usynyńdar. Aiyna bálenbai myń dollar alatyn menedjerler, áleýmettanýshylar, keńesshiler usynsyn.
Ashat Qasenǵalidiń feisbýktegi jazbasynan
